© 2024 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
An verb ùnderstondya yw kefys seytek treveth i’n homylys Jowan Tregear ha dywweyth in Sacrament an Alter. In y erlyver a nawnjek dew ha hantercans yma Nance ow pryntya ùnderstondya gans dagyer dobyl dhyragtho, rag sygnyfia yth esa Nance ow cresy an verb dhe vos destys in Kernowek Adhewedhes yn udnyk. Dell hevel ytho yth esa Nance ow predery na veu ùnderstondya kefys in Kernowek bys dedhyow Tregear. Yth esa ev ow predery ytho y feu ùnderstondya benthygys dhyworth Sowsnek in dedhyow Tregear y honen. Apert yw bytegys fatell yw Nance myskemerys i’n mater-ma, rag certan yw fatell esa ùnderstondya in Kernowek fest moy avarr ès an secùnd hanter a’n whêtegves cansvledhen. I’n kensa try homyly in lyver Bonner, an text Sowsnek a veu trailys dhe Gernowek gans Tregear, ny a gav an examplys-ma a’n ger understande (Warlergh pùb exampyl me vydn ry an trailyans Kernowek): ‘And to vnderstand this thyng the better’ — rag may hallowgh ùnderstondya an mater-ma dhe well; ‘ye shall vnderstand’ — why a wra ùnderstondya; ‘there is none that understandeth’ — nyns eus onen a wra ùnderstondya; ‘we shall better vnderstande’ — ny a wra dhe well ùnderstondya; ‘being vnderstanded by the works of the world’ — ùnderstondys dre an oberow a’n creacion a’n bÿs. In pùb exampyl ena yma understande screfys gans a i’n Sowsnek saw ùnderstondya gans o i’n Kernowek. Nyns yw lyckly ytho fatell veu an ger understondya in Tregear benthygys dydro dhyworth understande Sowsnek y dhedhyow ev. Yth yw an verb ùnderstonden pòr gebmyn in Sowsnek dhyworth an tredhegves cansvledhen in rag. Hedna a yll bos checkys in gerlyver wàr lînen a’n Sowsnek Cres provies gans Ûnyversyta Michigan. Dhe nôtya yw kefrÿs fatell yw understonden gans o i’n tressa sylaben an spellyans ûsys dres oll an Osow Cres. Nyns yw kefys spellyansow gans a i’n tressa sylaben ma’s in textow adhewedhes ha spessly dhyworth Ÿst pò North Pow an Sowson. Yma hedna worth agan hùmbrank dhe gonclûdya fatell veu an verb ùnderstondya benthygys in Kernowek dhyworth Sowsnek Cres, martesen mar avarr avell an peswordhegves cansvledhen—pàn o an tressa sylaben o in Sowsnek adar a. Hèn yw dhe styrya fatell esa ùnderstondya in Kernowek mar avarr avell gwariow an Ordinalia. Mar nyns yw an ger destys i’n textow mar avarr avell hedna, hèn yw drefen an ger dhe vos re hir rag y ûsya in prydydhieth. Indelha nyns yw ùnderstondya gwelys bys in dyweth an whêtegves cansvledhen in homylys Tregear, rag an text-na a veu screfys in yêth plain pò ‘prose’. In dyllans amendys a’n Gerlyver Meur yma an auctour an Doctour Ken George, ow leverel an ger ùnderstondya dhe vos: an ger arketîpek a Gernowek Prownter, dampnys yn crev rag devnyth pùb dëdh oll gans Kernowegoryon present orth udn Dyweth Seythen a’n Tavas Kernowek. ‘Kernowek Prownter’ yw an sort a Gernowek ûsys gans mebyon lien rag dysqwedhes aga dyscans ha skentoleth. Saw nyns eus dùstuny vÿth y fedha an ger ùsys spessly gans pronteryon. Pelha ny dhal dhyn consydra dyscoryon leundevys, bohes aga godhvos a’n tavas, dhe vos an gwelha jùjys a Gernowek dâ. Rag hedna me a vynsa comendya heb gwil vry vÿth a lavar dygompes an Doctour George.