(11) Padryk Sans - lovinglivingcornish

Clyckya obma ha goslowes / Click here to listen

Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

An seytegves dëdh a vis Merth yw Degol Padryk. Padryk yw sans tasek Wordhen saw nyns o va Godhal. Ev a veu genys in Breten Veur, in soth a Scotlond martesen, in cres an pympes cansvledhen. Pàn o va adro dhe whêtek bloodh ev a veu sêsys gans morladron ha drës dhe Wordhen, le mayth o va keth dres whegh bledhen hag ev ow pugelya deves. Ev a scappyas bytegyns hag a dhewhelys dh’y deylu in Breten Veur. Wosa bos gwrës prownter wàr an brâstir, ev a dheuth dhe Wordhen ha dallath y whel rag lesa an grejyans Cristyon i’n pow. An bobel moyha a bris i’n termyn-na in radn north a Wordhen o an Ulaidh ha’ga chif plass o Emain Macha. Padryk a fùndyas y eglos vrâs ryb an tyller-na in Ard Macha pò Armagh, ha hèn yw chif-tyller eglosek Wordhen bys i’n jëdh hedhyw. Yth esa gallos an Ulaidh in peryl i’n dedhyow-na dhyworth aga eskerens dhe’n west. An eskerens a wrug dystrôwy Emain Macha wàr an dyweth ha res veu dhe’n Ulaidh omdedna dhyworth an tyller ha mos dhe Dún, tre pelha dhe’n Ÿst. Dell hevel Padryk êth gansans rag y feu Padryk encledhys in Dún hag yth yw an tyller-na gelwys Downpatrick hedhyw i’n jëdh. Dell hevel kyns ès Padryk dhe dhallath y ober yth esa in soth a Wordhen cadnas Cristyon aral henwys Pallâdiùs. Heb mar i’n canslvedhydnyow warlergh Padryk y sewysy in Armagh a wre dysprêsya lavur Pallâdiùs pò ascrîbya dhe Padryk ober Pallâdiùs y honen hag ytho an dhew sans yw kemyskys i’n textow coth. Yth yw leverys yn fenowgh fatell wrug Padryk banyshya serpons in mes a Wordhen. An gwiryoneth yw, bytegyns, nag esa serpons in Wordhen in dedhyow Padryk, drefen y dhe verwel in kerdh in oos an yey ha na yllens y dewheles dres an mor. Yma an deyrdelen pò shamrock kelmys gans Padryk kefrës. Yth yw hedna campollys in lyver adro dhe flourys Wordhen dyllys gans Caleb Threlkeld in Dulyn i’n kensa hanter a’n êtegves cansvledhen. Threlkeld a lever dhyn an dus dhe vos ûsys dhe wysca teyrdelen in aga hot degol Padryk drefen an sans dhe dhesky mystery an Drynsys dhe’n Wydhyly in udn wil devnyth a’n plans-na. Hag yma Threlkeld ow pêsya: ‘Pàn wrellens y glebya aga theyrdelen (when they wet their seamrog) yn fenowgh ymowns y owth eva re hag ow medhowy.’ Nyns yw hedna, yn medh ev, an fordh ewn dhe wordhya dëdh sacrys dhe Dhuw. Yma Threlkeld, neb o menyster protestant, owth addya: ‘Dell yw ûsys yma errour ow lêdya dhe harlotry.’