© 2018 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
In y erlyver Sowsnek-Kernowek a’n vledhen mil naw cans hanter-cans ha dew yma Nance ow comendya mos ha bos ha dos ha bos rag ‘to become’. Res yw avowa nag yw onen vëth a’n dhew-na kefys in tyller vëth i’n tavas hengovek. Yth yw dos dhe vos kefys unweyth bytegyns, rag yma Tregear ow screfa: dre an dysobedyens a unn den meur a dheuth dhe vos pehadoryon ‘by the disobedience of one man many became sinners’. Yma fordhow erel i’n textow rag leverel ‘to become’. Y hyll an verb mos ‘to go’ bos ûsys y honen oll. In Bêwnans Meryasek ny a gav: pan vewgh in henna golhys yth ewgh gwynn avell crystal ‘when you are washed in that you will become as white as crystal’. Hag in Resurrexio Domini yth yw screfys: in carn i’n mor er y bynn yma dowr ow mos garow ‘on a rock in the sea water is becoming rough against it’. An form perfëth gallas ‘has gone’ a yll bos ûsys inwedh gans an keth styr, rag ensampyl Adam in Origo Mundi a lever dhe Eva: agan corfow noth gallas ‘our bodies have become naked’. Pelha yth yw gyllys, an hanow gwadn verbek a mos, ûsys in kepar maner. In Creacyon an Bÿs rag ensampyl Seth a lever adro dhe Adam y das: rag yth yw ev coth gyllys ‘for he has become old’. Fordh aral rag leverel ‘to become’ yw gans an verb codha ‘to fall’, rag ensampyl orth dallath Jowan Chy an Hordh: ha’n whel a godhas scant ‘and work became scarce’. Y hyllyr kefrës ûsya bos gwrÿs ‘to be made’ gans an sens ‘to become.’ Rag ensampyl an lavarow-ma in mes a Sacrament an Alter: An chalys yw lenwys a win ha dowr: pàn vo geryow Crist côwsys ena yma gwrÿs goos agan Arlùth Crist ‘The chalice is filled with wine and water; when the words of Christ are spoken, it becomes the blood of our Lord Christ.’ Fordh aral whath rag leverel ‘became’ in termyn passys yw gwil devnyth a’n amser tremenys pò ‘preterite’ a bos ‘to be’. Rag ensampyl in Bêwnans Meryasek ny a red: bythqweth ny veu vas i’n pow abàn veus Cristyon heb wow ‘never was there good in the land since you became a Christian indeed.’ Yma ensampyl aral kefys in Passyon agan Arlùth. Nyns esa kerensa vëth inter Erod ha Pylat, saw pàn wrug Pylat danvon Jesu dhe Erod may halla ev y dhampnya, ena y feu cowethyans brâs kelmys intredhans; dell lever Passyon agan Arlùth: i’n eur-na kescowetha y a veu ha specyal brâs ‘then they became comrades and particulary great ones’. Mos ha bos, dos ha bos bytegyns a yll bos settys adenewen.