© 2018 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
In y erlyver brâs Sowsnek - Kernowek rag ‘I am hungry’ yma Nance ow comendya yma nown dhymm ha ewl dybry a’m beus. Res yw avowa bytegyns nag yw onen vëth a’n lavarow-na kefys i’n textow Kernowek. Pelha rag ‘hungry’ avell ger ganso y honen yma Nance ow comendya try ger: nownek, ewlek ha gwak. Nyns yw nownek kefys i’n tyller vëth i’n textow nag ewlek na whath. Gwak yw form an ger in Kernowek Udnys. I’n sortys a Gernowek ûsys in agan dedhyow ny an ger-na yw leverys gwag. Y styr gwredhek yw ‘empty’. Gwag ‘empty’ bytegyns yw an ger ewn rag ‘hungry’ in Kernowek a bùb oos. Gesowgh ny dhe veras orth an examplys i’n textow. I’n gwary Origo Mundi pàn wrella an el herdhya Adam hag Eva in mes a baradîs, Adam a lever Ow holon gwag, dyvotter re’m kemmer hag awel boos ‘With my belly hungry, famine will seize me and craving for food’. Termyn wosa hedna Caym, hèn yw Cain in Sowsnek, a ladh y vroder Abel hag yth yw ev ytho molethys gans Duw. Caym a lever: lemmyn dyfreth ov ha gwag pòr wir dres oll tus an bÿs ‘now I am weak and hungry indeed above all men in the world.’ In Bêwnans Meryasek crosser pò ‘crozier-bearer’ epscop Poly yw trist na yll ev debry kyns dyberth. Ev a lever: gwag yv dhymm an pengasen—a mollath Duw i’n gegyn, scant yw an dewas ha’n boos ‘hungry is my belly—oh, God’s curse in the kitchen; scarce is the drink and the food.’ In y drailyans a’n peswora chapter a Awayl Sen Mathew Wella Kerew a scrif adro dhe demptacyon Crist: ha pàn wrug ev penys dew ugans jorna ha dew ugans nos e veu woja nena gwag ‘and when he had fasted forty days and forty nights he was thereafter hungry.’ Wotyweth i’n lavarow Kernowek in dyweth y lyver yma William Pryce ow ry an lavar-ma: gwag ov vy; a wrav vy gawas hawnsel ‘I am hungry; shall I have breakfast’. An ger rag ‘hunger’ in Kernowek yw nown; hag yth yw an ger-na kefys unweyth in Kernowek Coth, unweyth in Origo Mundi ha dywweyth in Bêwnans Kê. I’n gwary dewetha-na rag ensampyl servont Tewthar mytern a lever: Me a’m bÿdh drog-nown haneth gans Tewthar pàn vo clôwys ‘I shall suffer severe hunger tonight when Tewthar hears of it’. Saw dell welsyn ny, rag leverel ‘I am hungry’ in tavas hengovek an fordh ewn yw Gwag ov vy pò Me yw gwag.