© 2018 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
Yma lies whedhel nag usy i’n Beybel saw a veu desmygys i’n Osow Cres rag efany ha moghhe an Beybel y honen. Cùntellyans arbednek a whedhlow a’n sort-na yw aswonys avell Henwhedhel an Grows pò in Sowsnek ‘the Legend of the Rood’. An Henwhedhel a lever fatell dhanvonas Adam, termyn cot dhyrag y vernans, Seth, y vab yonca, wàr dhelergh dhe baradîs dhe gafos an oyl a vercy. Ny yll an el orth yet paradîs grauntya hedna dhe Seth, saw ev a re dhodho teyr sprusen aval pò ‘apple pips’ dhywar an wedhen forbyddys. Seth a dhewhel tre ha pàn vo Adam marow, ev a worr an sprusednow-na in dewfrik ha ganow y das ha’y encledhyas in Golgotha. Yma teyr gwedhen ow spryngya in bàn in mes a’n sprusednow, hag ymowns y ow jùnya warbarth avell tôkyn a’n Drynjys. Yma lies tra ow wharvos dhe’n predn marthys-na, saw wàr an dyweth crows Crist yw gwrës anodho. Elementys dhyworth Henwhedhel an Grows a yll bos gwelys i’n gwariow Kernowek. In Origo Mundi rag ensampyl yma sery predn mytern Salamon whensys dhe ûsya an predn rag byldya an templa, saw ny yll an predn bos ewnhës dhe’n hirder ewn. Par termyn re hir ywa ha par termyn re got. Apert yw an predn dhe vos benegys gans Duw ha rag hedna ymowns y worth y settya in onour i’n templa nowyth-gwrës. Nena yma benyn yonk, henwys Maxymyla, owth entra i’n templa hag owth esedha wàr an predn. Adhesempys hy dyllas yw anowys gans tan; hy a wel vesyon hag a wra profecy adro dhe salvacyon an bÿs dre vernans Jesu Crist. Pàn wrello an Yëdhowon i’n templa clôwes Maxymyla owth henwel Crist, y yw serrys brâs. Y a wra hy despîtya, hy cronkya ha’y ladha. In newores Maxymyla a gry in mes:
Arlùth Jesus Crist a nev,
kemmer mercy a’m enef,
dell ov ragos tormentys.
Cresys yw i’n whedhel Maxymyla dhe vos an kensa martyr Cristyon, kyn whrug hy bewa ha merwel termyn hir kyns ès Crist. Mater a sowthan ywa kefrës nag yw an story a Maxymyla godhvedhys dhe scoloryon ma’s dhyworth dyw benfenten. An kensa yw bardhonek in Sowsnek Cres dhyworth Northùmbrya. An secùnd yw an gwary Kernowek Origo Mundi. Apert yw nag eus gwiryoneth istorek in whedhel Maxymyla, saw an epysôd-ma ow tos orth dyweth Origo Mundi, kensa gwary an Ordinalia yw kevren inter an whedhlow mes a’n Testament Coth ha passyon Crist i’n secùnd gwary.