© 2018 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
Yth yw gwelys adro dhe’n fosow wàr jy in lies eglos rew a imajys bian a Fordh an Grows pò ‘the Stations of the Cross’. Hèn yw dhe styrya rew a byctours bian ow tysqwedhes peswardheg prÿjweyth in fordh Crist bys in Mownt Calvary. I’n kensa pyctour yma Pylat ow tampnya Crist dhe’n mernans; i’n stacyon dewetha yma Josef Baramathia ow settya corf marow Jesu i’n bedh. Yma devôcyon arbednek ow longya dhe fordh an grows neb a vëdh performys spessly i’n seythen dhyrag Sul Pask. I’n wheffes stacyon y hyll bos gwelys benyn ow seha fâss mostys Crist gans qweth. In termyn passyon Crist, herwyth crejyans an bobel, y wharva merkyl rag an imach a fâss Crist a veu gesys wàr an gweth. Res yw avowa nag yw an venyn-na complys in tyller vëth i’n Testament Nowyth. Desmygys veu an whedhel in cansvledhydnyow avarr an eglos. Dell yw ûsys, an venyn yw aswonys avell Veronyca, ha hèn yw hanow ewn, rag yma an ger Latyn vera ow styrya ‘gwir, gwiryon’ hag icon yw an ger Grêca rag ‘imach, pyctour’. An gweth may feu fâss Crist impryntys warnedhy yw gelwys an ‘sudarium’ pò ‘clout whës’. Yma genen ny in Kernowek gwary adro dhe bassyon ha mernans Crist henwys Passio Christi. Kynth yw taclow apocryfal erel dhe verkya i’n gwary-na, nyns yw Veronyca na’y veyl complys ino. I’n bardhonek hir Passyon agan Arlùth, bytegyns, yth yw mencyon gwrës a venyn ow metya gans Crist wàr y fordh dhe Calvary. Yma hy ow mailya corf Crist in qweth. Nyns yw tra vÿth leverys adro dhe imach fâss Crist wàr an gweth. Otta gwers cans seyth deg seyth in mes a Passyon agan Arlùth:
Unn venyn dhâ a welas
dell o Jesus dystryppys.
Pyteth meur a’s kemeras
rag y vos mar vil dyghtys.
Unn qweth teg hy a drailyas
adro dhodho desempys
ha wàr nans hy a’n qwethas
rag gwitha na ve storvys.
Mars yw an venyn-na intendys dhe vos Veronyca, nyns yw hy hanow complys. Veronyca a’s teves part a bris bytegyns i’n tressa gwary, Resurrexio Domini, ow tùchya mernans Pylat. Me a vydn côwsel adro dhe hedna nessa seythen.