(127) Nathy Sans - lovinglivingcornish

Clyckya obma ha goslowes / Click here to listen

Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Eglos Wordhen ‘the Church of Ireland’ yw eglos Anglycan. Dre rêsons istorek yma hy ow qwetha lies onen a eglosyow coth Wordhen ha gansans aga henwyn coth. Ensampyl dâ yw pluw Anglycan Taney dhe’n soth a Dulyn. Taney yw an form Sowsnek a’n Godhalek Teach Nath Î, hèn yw ‘Chy pò Eglos Nath Í.’ Nath Í Sans a veu genys i’n wheffes cansvledhen in Achadh Conaire pò Achonry in Conteth Sligo. Ev a fowndyas eglos in Achonry ha dres lies bledhen an eglos-na a veu peneglos an epscobeth a’n keth hanow. In agan dedhyow-ny nyns yw meur in nùmber an Anglycans i’n côstys-na ha’n eglos a veu degës nebes bledhydnyow alebma. Tîtel sodhogyl in Sowsnek a eglos Achonry yw ‘St Crumnathy’s Church’. Ena Nathy yw an keth hanow avell Nath Í in Teach Nath Í/Taney. Crum yw form cot’hës a’n ger cruimther ‘prownter’ in Godhalek Coth. Cruimther yw goos nessa an ger premther ‘prownter, oferyas’ in Kembrek Coth. Ymowns y aga dew, ha’n Kernowek prownter kefrÿs, ow tos dhyworth premiter ‘oferyas’ in Latyn Bretednek, versyon legrys a presbyter in Latyn classycal. Yma Nath Í ow styrya ‘mab wydn an ewen, grandson of the Yew tree.’ A les ywa fatell o Nath Í prownter Cristyon, saw y hanow o pagan. Hanow aral dhyworth an dedhyow pagan yw Mac Dara ‘mab an dherowen’. Kepar ha Nath Í Mac Dara Sans a veu genys i’n wheffes cansvledhen. Ev o Cristyon hag a vyldyas oratry dhodho y honen in enys Mac Dara wàr an cost west a Wordhen. Ev yw martesen an sans moyha kerys whath gans an bobel in oll an randir-na. Y fëdh degol in y onour ev solempnys kenyver bledhen an whêtegves a vis Gortheren. Yma henwyn pagan erel a’n keth sort complys i’n textow coth, kyn nag yw sans Cristyon den vÿth anodhans: Nad Fraoigh ‘mab wydn an grug, grandson of heather’, Mac Caorthainn ‘mab kerdhynen, son of the rowan tree’, Mac Coill ‘mab collwedhen, son of the hazel’ ha Mac Draighin ‘mab spernen, son of the blackthorn’. Yth hevel na wre benenes an dedhyow avarr recêva hanow gwedhen. I’n contrary part lies benen a gafas hanow esa ow referrya dhe sortow dyvers a hasednow, rag ensampyl Gráinne ‘men frût pò seed’, Eithne ‘sprusen pò kernel’ ha Deirdriu, Deirdre ‘mesen pò acorn’. Yth hevel inwedh na vedha henwyn losowek ‘botanical names’ ûsys in mesk an Gembrion na’n Gernowyon. Me a vydn leverel neb tra ow tùchya aga henwyn y neb termyn aral.