© 2018 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
I’n gramer Kernowek in Archaeologia Britannica yma Lhuyd ow referrya dhe’n wers teyr lînen in Kembrek gelwys englyn hag ev a re nebes ensamplys anedhy. Ena yma va ow ry udn ensampyl a’n keth form a glôwas ev in Kernow:
An lavar coth yw lavar gwir:
Bëdh dorn re verr, bëdh tavas re hir,
Mès den heb davas a gollas y dir.
Lhuyd a elow an wers-na englyn kefrÿs hag a lever an englyn dhe vos ertach kebmyn an dhew davas Brethonek. Ny a wor lebmyn fatell vedha an ger englyn pò eglyn ûsys in Kernowek y honen. In Bêwnans Ke Arthùr Mytern a lever dh’y gothmans:
Deun, ow amours ha’m cuvyon,
gans solas hag eglynnyon,
ha myrth ha melody wheg
dh’agan palys.
Yma ger aral in Kernowek usy ow cul dhyn predery fatell esa tradycyon genesyk a brydydhieth pò ‘poetry’ whath ow pêwa i’n tavas i’n Osow Cres. In Kernowek Coth ny a gav an ger pridit ‘poeta; poet’. Yma an keth ger kefys in Bêwnans Ke kefrÿs, le mayth usy onen a ganajow Arthùr in Rom owth ûsya an lavar an prydyth mort ‘the dead poet’. Dre lycklod yma hedna ow referrya dhe Vyrjyl, rag ev o onourys brâs avell prydyth i’n Osow Cres dre rêson ev dhe dhargana devedhyans Crist. Heb mar prydyth in Kernowek yw an keth ger avell prydydd ‘poet’ in Kembrek; hag ymowns y aga dew ow tos dhyworth an wredhen Geltek usy ow styrya ‘shâp, tra greatys, tecter’. Nyns eus ger vÿth bytegyns kefys i’n textow Kernowek rag ‘poetry’ na rag ‘poem’. Rag an kensa anodhans Nance a brofyas an ger *bardhonieth wàr an patron a’n geryow barddoniaeth ‘poetry’ in Kembrek ha barzhoniezh ‘poetry’ in Bretonek. Rag ‘poem’ Nance a gomendyas *bardhonek, ger growndys wàr barddoneg ‘poem’ in Kembrek ha barzhoneg ‘poem’ in Bretonek. An kensa cùntelles a Orseth Kernow a gemeras le in Boscawen Ûn i’n vledhen mil naw cans dew dheg eth. An ger rag esel an Orseth nowyth-fùndys o bardh, liesek berdh, ha hedna a veu dôwysys wàr batron an ger Kembrek bardd, esel a Orseth Kembra. Styr porposys an ger Kernowek bardh o ‘poet’, hag ytho ‘den kelmys gans gonesygeth’. Ny worama bytegyns o fur an hanow-na rag esel a Orseth Kernow. Yth yw an ger barth kefys in Gerva an Kernowek Coth, rol geryow in Latyn ha Kernowek. An geryow Latyn rës rag styrya barth in Kernowek yw mimus ha scurra; in Sowsnek an re-na a via ‘actor in a farce’ ha ‘buffoon’.