(140) Broder Odryk - lovinglivingcornish

Clyckya obma ha goslowes / Click here to listen

Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Odryk a Pordenone a veu genys in North-Ÿst a Italy orth dyweth an tredhegves cansvledhen. Ev a veu recêvys in ordyr an Vreder Lyha pò ‘Francyscans’ hag i’n vledhen mil try cans êtek ev a veu danvenys dhe’n Ÿst rag progeth an awayl. Ev a dhalathas in Padùa hag êth dhia Venys ha Constantynôpel ha dres an Mor Du dhe Trebyzond. Alena ev a viajyas in Armênya, Mêdya ha Persya, rag in oll an powyow-na yth esa myssyons fùndys gans an Francyscans. Ev êth dhe Bagdad ha dhe Vorblêg Persya. Ena ev ha’y goweth Jowan Godhal dhyworth Wordhen a wrug golya dhe Eynda hag a diras ogas dhe Mùmbay. Ev êth dhe Pùry hag a ros an kensa acownt Ewrôpek a dhegol Jaganath (‘Juggernaut’ in Sowsnek agan dedhyow ny). Ev a asas Eynda ha golya dhe Sùmatra; wosa hedna ev a vysytyas Jâva, Bornêo ha Gwangjow. Ev a drailyas dhe’n north ha warlergh passya dre lies cyta in pow aswonys dhyn hedhyw avell Chîna, ev a dhrehedhas wàr an dyweth pencyta an emprour pò an Khan brâs. Dre lycklod an emprour o Yesün Temür Khan, rag i’n dedhyow-na emprours Chîna o a dhevedhyans Mongol ha sewysy Genghis Khan. Odryk a spênas teyr bledhen in Chîna hag ena ev a dhalathas wàr y fordh tre ha dewheles dhe Italy adro dhe vil try hans naw warn ugans. In chy an Francyscans in Padùa ev a ros acownt a’y viajys dhe vroder a’n ordyr neb a screfas an derivas in Latyn sempel. In cres an pymthegves cansvledhen y feu radn a’n text Latyn trailys dhe Gembrek gans prydyth henwys Syr Davyd Vychan a Morganûg. Caradar a drailyas dhe Gernow darnow in mes a’n text Kembrek hag y a veu dyllys gans Talek in Kemysk Kernewek in bledhydnyow try ugans an gansvledhen dhewetha. In darnow trailys gans Caradar ny a red a lies tra goynt a welas Broder Odryk wàr y viajys in Âsya. Yma whedhel gans Odryk a vanaghty in cres Âsya le may fedha bestas gwyls megys gans an venegh drefen y dhe gresy enevow pobel varow dhe vos tregys inhans. Yth yw dùstuny an whedhel-na a grejyans kebmyn in Âsya a dhasincarnacyon. Yn arbednyk Odryk a lever dhyn adro dhe splander ha rycheth an emprour in y bencyta henwys Kambelech (Beijing hedhyw). I’n versyon Kembrek pow an emprour yw gelwys Cattai ha hèn yw trailys gans Caradar avell Cathay. Heb mar ‘Cathay’ yw hanow coth rag Chìna in Sowsnek hag in tavosow Ewrôpek erel. Yth yw Cathay ow hanow preferrys vy rag ‘China’ ha Cathayek rag ‘Chinese.’