(141) Eglantyne Jebb - lovinglivingcornish

Clyckya obma ha goslowes / Click here to listen

Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

In y drailyans a’n secùnd chaptra a awayl Sen Mathew Wella Kerew a scrif: Nena Herod pà’wrug e gweles fatelll o ges gwrÿs anodha gen an tus fur, yw engrys; ha a dhavonas mes ha a ladhs oll an flehes era in Bethalem ha oll adro in dadn dew vloodh coth. An wharvedhyans-na, ladhva an inocens sans, a wra dhyn remembra pàn vo strif inter tus leundevys, yth yw an flehes usy ow sùffra dhe lacka. In gwir hèn o tybyans parhus Eglantyne Jebb, fùndyores a’n ‘Save the Children Fund’ (‘Save the Children’ lebmyn). Eglantyne a veu genys in mil eth cans seyth deg whegh hag a gafas dyscans in ûnyversyta Resohen. Hy a veu descadores saw yn scon hy a welas fatell esa problem brâs a vohosogneth ow shyndya an bêwnans a flehes bian. Hy a veu gwythresek ytho in cowethyansow cheryta rag gwelhe an standard a vêwnans a flehes hag a bobel yonk. I’n vledhen mil naw cans tredhek hy a veu pesys dhe vysytya Macedoyn, le mayth esa taclow pòr dhrog warlergh gwerryansow an Balcans. Hy a remainyas ena erna dhalathas an Gwerryans Brâs. Hy a gemeras part brâs in caskergh sowen warbydn kerhydnans pò ‘blockade’ Austro-Ùngary; rag yth esa flehes cres Ewrop ow sùffra yn uthyk. I’n kensa bledhen warlergh dyweth an gwerryans brâs Eglantyne ha’y whor a fùndyas ‘Save the Children Fund’ rag dry sosten ha gweres dhe flehes Jermany hag Austrya. Gans scodhyans crev dhyworth Eglantyne y feu Udnyans Kesgwlasek Selwel an Flehes settys in bàn in Jenêva, Helvêcya, an nessa bledhen. Pàn esa taclow owth amendya in cres Ewrop, y feu ken gorotham ow tevy in Grêss le mayth esa mîlyow a bobel foesyk. Ha warlergh hedna y wharva gorotham brâssa whath: an dyvotter uthyk in Rùssya dre rêson a bolycys anfusyk a’n governans Bolshevyk. Eglantyne a gresy pùpprës fatell o bysy towledna gans rach pùb assay dhe welhe savla an flehes ha dhe dry gweres dhodhans. Wàr iniadow Eglantyne y feu an Declaracyon ow tùchya Gwiryow Flehes adoptys gans Cùntelles an Nacyons in mil naw cans dew dheg peswar. Yth o an Declaracyon-na onen an chif-inspîracyons adhelergh dhe’n Acord an Nacyons Udnys ow tùchya Gwiryow Flehes, neb a veu agries orth dyweth an gansvledhen dhewetha. Eglantyne Jebb o clâv dres lies bledhen gans problem pensagh pò ‘goitre.’ Hy a verwys in mil naw cans dew dheg eth. Ny vëdh ny ankevys nefra. Rag ensampyl hy yw remembrys an seytegves dëdh a vis Kevardhu in Dedhyador Eglos Pow an Sowson. Re bo cres Duw dh’y enef nôbyl hy!