(146) Nessa bledhen - lovinglivingcornish

Clyckya obma ha goslowes / Click here to listen

Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Yth o an dhew vater brâs i’n bolytigieth hevleny gwythres presydent an Stâtys Udnys ha’n sclandrow adro dodho ha’n qwestyon a’n Wlascor Udnys ow cessya dhe vos esel a’n Udnyans Ewrôpek. I’n vledhen eus passys yth esa kebmys ancertuster ow pertainya dhe’n dhew vater-na ha pelha y aga dew o skyla a fienasow brâs dhe gebmys pobel, may whren vy predery dres an vledhen, y fedha gwell heb gwil mencyon vëth a’n eyl pò a’y gela. Yth hevel bytegyns fatell wren ny gweles dysplêgyansow nessa bledhen i’n dhew vater, i’n Stâtys Udnys hag i’n enesow-ma. In dôwysyansow cres-termyn in mis Du Democratyon Ameryca a wainyas lies esedhva in Chy an Canasow. Rag hedna y fëdh moyhariv gansans mis Genver in rag. Yma hedna ow styrya fatell allons y whythra negyssyow personek an presydent ha dre laha cafos oll an dogvednow a vo res, y dherivasow tollow pò ‘tax statements’ rag ensampyl. Y a wra cafos in mes ow tùchya mellyans an Rùssyans i’n dôwysyans Amerycan. Y a vydn whythra kefrës an pêmons rës rag gwetha benenes dhyworth côwsel yn egerys a gowethyans carnal an presydent gansans. I’n Wlascor Udnys apert yw nag usy an kescùssulyansow ow tùchya Bretmes pò ‘Brexit’ ow mos re dhâ. Yth o apert dyw vledhen alebma fatell vedha kildednans an Wlascor Udnys mater pòr dyckly. Mar teu an pow ha gasa an Udnyans Porthtollow pò ‘Customs Union’ ha’n Varhas Wàr Jy pò ‘Internal Market’, an sewyans a vëdh fest anwhek rag pùb part a’n Wlascor Udnys ha rag kenyver onen i’n pow kefrÿs. Mar ny wra ma’s Wordhen North remainya in Udnyans Porthtollow, hedna a wra damach dhe unsys an Wlascor Udnys. Mar teu an Wlascor Udnys yn tien gortos in Udnyans Porthtollow hag i’n Varhas Wàr Jy warbarth, saw heb bos esel a’n Udnyans Ewrôpek, an pow a vëdh in dadn arlottes an Udnyans Ewrôpek mès heb gallos vëth dhe jaunjya an rêwlys. Acord inter governans Breten Veur ha’n Udnyans Ewrôpek a veu declarys in cres mis Du. Nyns yw sur fatell wra esely parlement Westminster assentya dhe’n agrians pàn vo sensys an vôta in mis Genver. I’n contrary part yma lies huny ow cresy na yll an mater bos assoylys marnas dre werynvôta pò ‘referendum’ nowyth. Ny a woffyth moy adro dhe hedna i’n vledhen usy ow tos. Kynth yw maters obma i’n enesow-ma ha tramor, spessly i’n Stâtys Udnys, pòr ancertus, me a vydn bytegyns whansa Bledhen Nowyth Dâ dhe oll ow goslowysy. Na fors pandra whervyth, re’gas bo oll lowender ha sowena in dyw vil ha nawnjek.