© 2019 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
Yma an ger Sowsnek ‘stool’ ow styrya esedhva isel, spessly heb keyn. In Kernowek an ger kebmyn rag ‘stool’ yw scavel, ger kefys in Gerva an Kernowek Coth. In Creacyon an Bÿs yma Duw ow kelwel an norvÿs y ‘footstool.’ I’n gwary hag ev ow shâpya an nev ha’n nor Duw a lever:
ha’n nor inwedh awoles
scon worth compas a vÿdh gwrÿs;
hodna a vÿdh ow scavel droos.
An keth tîtel yw ûsys in Sacrament an Alter rag an norvÿs, rag ena ny a red: Yth esof vy ow covyn: Pandr’yw scavel y dreys ev? An Scryptour yma ow leverel dhyn: an grownd yw scavel ow threys vy. Yth yw an ger scavel ûsys in ketestednow erel inwedh. Yma Pryce ow compla an lavar scavel an gow, hèn yw dhe styrya ‘bench of gossip, scandal party.’ Yth o an lavar-na dhe gafos in radnyêth Sowsnek Kernow. Yth yw an ger scavel ûsys kefrÿs gans Nicholas Boson hag ev ow côwsel adro dhe’n hudor Harry an Leder. Boson a scrif: an scavel crackya-codna ujy va’ sedha wàr in cres an âls uhel heb drog vëth. Scavel crackya codna yw esedhva dhiantel na alsa ma’s pystrior melegys esedha inhy. Mars eus keyn dhe’n esedhva, ena ‘chair’ yw hy in Sowsnek, ha rag ‘chair’ in Kernowek Nance a gomendyas cader. Yma cader in Kernowek, cador in Kembrek, kador in Bretonek ha cathaoir in Godhalek aga feswar ow tos dhyworth cathedra ‘chair’ in Latyn. Res yw avowa bytegyns nag yw an ger cader kefys in Kernowek ma’s in henwyn tyleryow yn udnyk, Chapel an Gader in Peran Treth, rag ensampyl. I’n textow Kernowek an ger rag ‘chair’ yw chair. Yma exampyl dâ in Bêwnans Meryasek, le may lever epscop Kernow dhe Meryasek, an epscop nowyth sacrys:
Deus omma; eseth i’th chair;
gwysk dha dhyllas i’th kerhyn.
In homylys Tregear yth yw chair ûsys dhe referrya dhe epscobeth Rom, rag Tregear a scrif: Den vÿth jùnys dhe chair Peder yth yw ow servant vy. In gwary Passio Christi yth yw kefys an form liesek. An kensa soudour a lever dhe Pylat ha dhe Cayfas:
me a’s ordyn dhywgh wharê#
chairys ha formys plenta;
esedhowgh, syra Jùstys.
Dell usy ow wharvos, yma an ger chair y honen ow tos dhyworth cathedra an Latyn inwedh, saw dre Frynkek. Yth yw an ger chair kefys in henwyn tyleryow kefrës, rag ensampyl, Carn Chair in Senen ha Chair Leder in Seleven. Chair Leder yw hanow scavel crackya codna Harry Leder.