© 2016 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
An pympes dëdh warn ugans a vis Ebrel yw Anzac Day. Anzac yw form got’hës a Australian and New Zealand Army Corps pò Nerth Lu Austrâlya ha Zêlond Nowyth. Y feu an jëdh-na solempnys rag an kensa prës in mil naw cans ha whêtek rag remembra an soudoryon dhyworth Austrâlya ha Zêlond Nowyth a verwys an vledhen kyns in caskergh Gallipoli in Kensa Gwerryans an Bës. Jorna an Anzacs re beu solempnys in Austrâlya hag in Zêlond Nowyth ha gans pobel dhyworth an dhew bow-na dres oll an bës pùb bledhen wosa hedna. Hevleny dre rêson bos cans bledhen passys dhyworth kensa Jorna an Anzacs y feu servys cov sensys in Peneglos Crist in cres Dulyn De Sul dhyrag an jorna y honen. Me ha’m gwreg a veu present orto. Dhyrag an servys y feu kenys hympna nacyonal Austrâlya ‘Advance Australia Fair’ ha warlergh an servys ny a glôwas hympna nacyonal Zêlond Nowyth i’n tavas Maori. Caskergh Gallipoli a veu desmygys gans an Gefrysy pò Allies rag kemeres culvor an Dardanellês dhyworth an Turkys hag warlergh hedna dhe gerdhes in rag ha sêsya Constantynôpel, chif-cyta Turky. Kyn whrug an Gefrysysy lôndya wàr gorenys Gallipoli ha’y wetha dres spâss a eth mis, ny spêdyas an caskergh. Wàr an dyweth y feu res dhe’n gefrysy kildedna bys in Ejyp. Y feu moy ès peswar ugans soudour Turk ledhys in Gallipoli ha moy ès hanter-cans mil wàr an tenewen aral, in aga mesk adro dhe naw mil Austrâlyan ha teyr mil dhyworth Zêlond Nowyth. A bris yw caskergh Gallipoli rag istory Austrâlya ha Zêlond Nowyth. Y feu Austrâlya gwrës domynyon anserhak in mil naw cans hag onen, ha Zêlond Nowyth in mil naw cans ha seyth. Gallipoli ytho a veu an kensa prës rag an dhew nacyon yonk-na dhe omdhysqwedhes avell kevrenegyon wàr an waryva gesgwlasek. Yth yw tra aral a les inwedh. An very jorna may feu solempnys an kensa Anzac Day in mis Ebrel mil naw cans ha whêtek, bagas bian in Dulyn, heb sevel bythqweth in etholans vëth, a gemeras warnodhans aga honen omlath warbydn an very power esa an Anzacs ha lies mil Godhal inwedh ow merwel ragtho.