(171) Enys Wedren - lovinglivingcornish

Clyckya obma ha goslowes / Click here to listen

Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Yma Glastonbùry in Gwlas an Hâv in pow isel hag i’n termyn eus passys y fedha an tyller in dadn dhowr yn fenowgh. Ryb Glastonbùry yma Molvra Glastonbùry pò Glastonbùry Tor, bre neb yw moy ès pymp cans tros’hës in uhelder. Kyns ès an pow adro dhe vos desehys, y fedha an vre yn fenowgh in cres dowr hag ytho kepar hag enys. In Sowsnek Coth an dre o gelwys Glestingaburg, hèn yw dynas an Glestingas, bagas a Saxons. An Gembrion bytegyns a wre kelmy an kensa element in ‘Glastonbùry’ gans an ger Sowsnek ‘glass’ hèn yw gweder. Pelha dre rêson bre Glastonbùry i’n dedhyow coth dhe vos enys yn fenowgh, an Gembrion a ros dhe Glastonbùry an hanow Ynys Wydrin pò ‘Island of Glass’. In Kernowek hedna a via Enys Wedren. Abaty Enys Wedren a veu fùndys i’n seythves cansvledhen. Y feu an byldyans dystrôwys yn tien i’n dhewdhegves cansvledhen saw y feu va dasvyldys, hag ajy dhe dhew gans bledhen yth o Abaty Enys Wedren onen an managhtiow moyha rych in oll Pow an Sowson. Lebmyn bysy yw dhybm gasa whedhel Enys Wedren pols ha côwsel adro dhe Jeffry Menow pò Geoffrey of Monmouth, ha’y lyver brâs, Istory Myterneth Breten Veur. Jeffry a vêwas i’n kensa hanter a’n dhewdhegves cansvledhen. Ev a veu ordnys prownter ha sacrys epscop a Llanelwy (‘St Asaph’ in Kembra) in cres an gansvledhen. Dre lycklod ny wrug ev bythqweth vysytya y epscobeth awos an ancres in north a Gembra i’n dedhyow-na. Jeffry a verwys in mil, udn cans hanter-cans ha pymp. Fug-istory yw lyver Jeffry, kynth yw gwir-wharvedhyansow campollys obma hag ena in y folednow. Jeffry a screfas in Latyn saw ev a lever fatell gafas ev radn vrâs a’y istory in mes a lyver screfys in Kembrek. Dell hevel hèn yw gow. Yma an istory ow terivas whedhel Breten Veur dhyworth an dallath pàn dheuth tus Troya dhe Vreten in dadn aga lêdyor Brûtùs. Herwyth Jeffry an pow a veu henwys Breten in cov Brûtùs y honen. Brûtùs yw an kensa den brâs in istory Jeffry. An secùnd yw Belînùs. Ev a wrug mytern a oll Breten anodho y honen hag ena conqwerrya Gâl ha pylla Rom. An tressa den a bris yw Arthùr Mytern. Yma Arthùr ow conqwerrya meur a’n brâstir saw ev yw traitys gans Modres, neb yw noy dhodho. Yma Arthùr ha Modres ow metya in batel Camlan. Modres yw ledhys hag yth-yw Arthùr drog-pystygys. Arthùr yw drÿs in kerdh bys in Enys Avalon may halla bos sawys y woliow. I’n bledhydnyow warlergh termyn Jeffry Enys Avalon a veu determys dhe vos an keth tyller avell Enys Wedren y honen. Me a vydn côwsel adro dhe hedna nessa seythen.