(172) Josef Baramathia - lovinglivingcornish

Clyckya obma ha goslowes / Click here to listen

Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Dell welsyn ny, Jeffry Menow a screfas y istory in cres an dhewdhegves cansvledhen hag ino ev a lever na wrug merwel Arthùr Mytern. In contrary part Arthùr a veu degys dhyworth gwel batel Camlan dhe dyller henwys Avalon. Ena ev o dhe vos sawys a’y woliow poos. Orth dyweth an dhewdhegves cansvledhen y feu declarys fatell veu bedh Arthùr Mytern dyscudhys down i’n dor in Enys Wedren pò Glastonbury in Gwlas an Hâv. Yth hevelly inwedh fatell veu crows a blobm dyscudhys warbarth gans an bedh, ha screfys orty in geryow Latyn: Yma a’y wroweth encledhys obma in Enys Avalon Arthùr Mytern a’n hanow brâs. Apert o dhyworth an inscrypcyon-na fatell o Enys Wedren pò Glastonbury cresys dhe vos an keth plâss avell Enys Avalon. Hèn yw an tyller may feu Arthùr degys warlergh batel Camlan. Kellys yw an grows lebmyn saw cler yw nag o an bedh na’n grows ma’s contrefeytyans, desmygys rag encressya roweth managhty Enys Wedren. Saw nyns usy fug-istory Enys Wedren ow tewedha gans an taclow-na. Josef ó Arimathea yw campollys i’n awaylow. Ev o Yêdhow a bris neb a besys corf marow Crist orth Pylat, may halla va y settya gans meur revrons in y vedh men y honen, na veu ûsys dhyrag dorn gans den vëth. Josef yw person i’n gwariow Kernowek Passio Christi ha Resurrexio Domini, mayth ywa gelwys Josef Baramathia. I’n gwariow Kernowek yma Josef ow qwary an part campollys ragtho i’n Testament Nowyth. I’n Osow Cres bytegyns meur a whedhlow a devys in bàn adro dhe Josef Baramathia. Orth dallath an dredhegves cansvledhen prydyth henwys Robert de Boron dhyworth Borgayn in ÿst a Frynk a screfas bardhonek hir ow tùchya Josef. Warlergh Robert Josef a gafas an hanaf ûsys gans Jesus orth an soper dewetha—hèn o an Greal Sans. Ev a’n kemeras dhe Vownt Calvary ha cachya ino goos Crist hag ev ow cregy i’n grows. Bledhydnyow warlergh hedna teylu Josef a dhros an hanaf dhe dyller i’n west henwys an vaus d’Avaron pò Nans Avaron. Screforyon erel wosa termyn Robert de Boron a jaunjyas Nans Avaron dhe Nans Avalon, hag a soposyas fatell veu an Greal Sans kemerys dhe Enys Wedren in Pow an Sowson. In versyons erel a’n whedhel whath Josef Baramatia y honen a dhros an Greal Sans dhe Enys Wedren ha’y encledhyas i’n dor ena, saw nyns o godhvedhys pleth esa an Greal dhe gafos. Gans hedna y talathas oll an whedhlow ow tùchya Whelas an Greal Sans pò ‘The Quest of the Holy Grail.’ Onen a’n gwelha bardhonegow Sowsnek adro dhe’n mater-na i’n cansvledhydnyow dewetha yw The Quest of the Sangraal gans Robert Hawker, prownter Morwena in Kernow North.