© 2019 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
Vlad Tipesh pò Dracùla o secùnd mab Vlad, Pensevyk Wallachya. An Pensevyk a veu gwrës esel a Ordyr an Dhragon gans Sygysmond, Emprour Sans Roman, dre rêson a’y sowena warbydn an Tùrkys. Rag hedna Vlad a gafas an les’hanow Dracùl ‘an Dhragon’ ha’y vab o aswonys avell Draculea, Dracùla, hèn yw ‘Mab an Dhragon.’ I’n vledhen mil peswar cans peswar deg êth yth o Dracùla sensys avell gwystel gans an Tùrkys, pàn glôwas ev fatell veu y das ha’y vroder cotha ledhys gans bryntynyon Wallachya. Ev a dhewhelys dh’y bow genesyk hag a whelas dres bledhydnyow a werryans dascafos tireth y das. Dracula a dhysqwedha garowder uthyk dh’y eskerens, rag y ûsadow o trewana (hèn yw ‘to impale’) y eskerens wàr stykednow lybm fastys i’n dor ha’ga gasa dhe verwel indelha in pain dywodhaf. Drefen ev dhe ladha y eskerens indelha Dracùla a vedha gelwys Vlad Trewanor pò ‘Vlad the Impaler.’ In spît dhe oll y gruelta yth yw Dracùla remembrys gans an Rûmanyans avell den brâs a wrug meur rag lesta an Tùrkys. I’n vledhen mil êth cans naw deg seyth an Godhal, Bram Stoker, a dhyllas y novel euth Dracùla. Nyns yw Dracùla an whedhel growndys wàr Vlad Trewanor a’n istory. I’n contrary part Dracùla an tîtel yw vampîr. Yth o whedhlow adro dhe vampîryow kebmyn in Rûmanya i’n dedhyow-na hag yth esa radn anodhans ow tos aberth in west a Ewrop. In whedhel Stoker nyns yw Dracùla naneyl bew na marow. Ev yw nosferatu pò in Sowsnek ‘undead.’ Ny vÿdh ev gwythresek marnas i’n ourys tewolgow an nos, pàn usy ev ow sevel in bàn in mes a’y eler hag ow mos alês in udn whelas persons may halla ev sugna aga goos. Mar teu va hag assaultya nebonen menowgh lowr, yma an person-na gwrës vampîr kepar hag ev y honen. I’n novel yma Dracùla tregys in castel brâs in Transylvanya (Rûmanya hedhyw) saw yma va ow spêdya dhe dhos in box wàr gorhal dhe Bow an Sowson. Ena yma va ow tallath sugna goos hag ow qwil moy a vampîryow. Aswonys veu Dracùla in Transylvanya gans Jonathan Hawker, ha gans gweres y wreg Mîna, an Doctour Helsyng ha cowetha erel yma Hawker ow spêdya dhe helhy Dracùla wàr dhelergh bys in y bow geneseyk. Nyns yw an wharvedhyansow i’n lyver derivys gans whedhlor; yma pùb tra settys dhyrag an redyor in lytherow, pellscrîvednow, artyklys in paperow nowodhow, ha darnow in mes a dhëdhlyfrow. Yma certan crytycoryon ow predery fatell yw Dracùla metafor rag arlydhy meur aga demondys esa i’n nawnjegves cansvledhen ow compressa bohosogyon Wordhen. Saw y hyll person Dracùla bos styrys in ken maner. Dres lies bledhen yth o Stoker menystror an actour Sir Henry Irving. Irving o leverys dhe vos omgaror pò ‘egotist’ hag arvedhor cales —saw den a dhynyans personek kefrës. Martesen y feu Dracùla growndys wàr an actour brâs. Mars yw nebonen whensys dhe redya Dracùla in Kernowek, ev a yll gwil indella gans ow thrailyans vy. Dyllys veu in dadn an tîtel Dracùla hag Ôstyas Dracùla i’n vledhen dyw vil ha whêtek. Yma Evertype orth y dhyllo hag yma va ow costya ugans puns.