© 2016 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
I’n gwary Kernowek Origo Mundi Duw a lever dhe Noy kyns ès dos an liv brâs:
Dew vgens dyth my a as
glaw the gothe awartha.
Yth yw an awel kepar ha hedna in Wordhen i’n tor’-ma. Yma glaw poos ow codha nans yw pelha ès dew vis hag ytho yma an pow ow codhevel livyow uthyk. Dres oll Wordhen yma treven in dadn dhowr, pobel gesys heb tredan ha heb dowr dhe eva hag yma damach gwrës a vydn costya lies mylyon ewro rag y êwna. I’n termyn eus passys Fermoy in Conteth Corky o onen a’n tyleryow lacka oll. Yma an dre-na wàr an Abhainn Mhór (An Awan Veur ‘the Munster Blackwater’) ha pàn wrella an ryver derevel, heb faladow y fedha strêtys an dre kepar ha lydn. Y feu Fermoy in dadn dhowr pymthek treveth ajy dhe dheg bledhen warn ugans. Rag hedna an Governans a wrug parusy towlen a vydna gwetha an dre warbydn lîvyow. Ervirys o byldya tomednow pò embankments, fosow parhus, yettys fros melyn ha lies ke lesta anbarhus dyw ladn an ryver ahës. An ober a dhalathas i’n vledhen dyw vil hag eth hag oll an oberow a veu gorfednys seyth bledhen moy adhewedhes. Lebmyn, kynth yw lies tre ha cyta aral ow sùffra yn uthyk dre rêson a’n lîvyow, yma strêtys Fermoy ow remainya sëgh. Saw res o spêna peswar deg hag eth myllyon ewro wàr an oberow-na in Fermoy yn udnyk. Pygebmys a vynsa costya oberow kepar hag y rag gwetha oll trevow brâs Wordhen dhyworth lîvyow?