© 2020 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
Yma an ger lew ‘lion’ kefys in Gerva an Kernowek Coth hag yma Pryce ow compla lewes ‘a lioness,’ kyn na lever ev ple whrug ev cafos an ger. In Kernowek Cres bytegyns an ger rag ‘lion’ yw lion hag yma try exampyl anodho: folla yn tâ y whela ès dell wra lion y bray dry den in pain a calla ‘he seeks to bring man to torment more wildly than does a lion seek his prey’ (Passyon agan Arlùth); whath lion goodh in y ogo dhis a inclyn ‘further a wild lion in his lair bows down to you’ (Bewnans Ke); hag yma agas escar an Tebel-El kepar ha lion owth uja ow mos adro ow whelas rag agas devôrya ‘your enemy the Evil Angel is like a roaring lion going about seeking to devour you’ (Tregear). Yth yw an lion campollys liesgweyth i’n Beybel. An devyn dhyworth Tregear menegys genef namnygen a veu kemerys in mes a’n kensa Epystyl a Peder. I’n lyver Jùjys yma lion gwyls owth assaultya Sampson hag ev a’n ladh gans y dhêwla y honen. Hag in Lyver Revelacyon Crist yw gelwys Lion a drib Jûda. Yth yw an lion best pòr gebmyn in herotry pò ‘heraldry.’ Rag ensampyl yma try lion ow kerdhes ow formya côta arvow Pow an Sowson hag yma lion udnyk in scochon Scotlond. Mater a sowthan ywa martesen fatell yw an lion complys mar menowgh i’n textow Kernowek, i’n Beybel ha’n lion dhe vos mar gebmyn in herotry an enesow-ma, rag in agan dedhyow ny nyns yw an lion gwyls kefys ma’s in Afryca. I’n dedhyow coth bytegyns yth o an lion kebmyn in Soth a Ewrop hag in Âsya. Meur a lions a wre gwandra in Grêss in dedhyow dhyrag Crist. Yth esa lions ow pêwa i’n Pow Sans bys i’n Osow Cres hag i’n Soth-West a Âsya bys in dyweth an nawnjegves cansvledhen, hèn yw dhe styrya in Araby, an Ëst a Tùrky, in Irân, in Irâk, ha dhyworth Dowr Indùs bys in cres Eynda. Lebmyn bytegyns yth yw an lion gyllys yn tien dhyworth oll an powyow-na marnas an North-West a Eynda. Dhia dhallath an ugansves cansvledhen yth yw an lion lymytys dhe Bark Kenedhlek Forest Gîr ha’n pow adro in provyns Gujerat. Yma Towlen rag Megyans Lion Âsya fest gwythresek i’n côstys-na. Yma y offycers ow cul nyverans a’n lions kenyver pymp bledhen. Dell hevel yma nùmber an lions owth encressya. I’n vledhen dyw vil ha deg y feu nyverys pymp cans ha try lion warn ugans. Dyw vledhen warlergh hedna yth o nùmber an lions encressys dhe whegh cans ha hanter-cans. Hèn yw nowodhow dâ, rag trueth via a pe lion Âsya gyllys dhyworth fâss an nor. Lyver an Proverbys a lever dhyn fatell yw nôbyl an lion hag onen a’n try thra usy ow kerdhes in maner stâtly hag ow mos in rag yn sêmly. An lion, yn medh Proverbys, yw an moyha galosek in mesk an bestas ha ny wra va plynchya dhyworth nagonen.