© 2020 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
Me a garsa hedhyw côwsel adro dhe nebes taclow a veu i’n nowodhow agensow hag ena campolla an termow Kernowek comendys genef ragthans. Kyns oll mater brâs o Bretmes pò Brexit. An Wlascor Udnys re asas an Udnyans Ewrôpean ha nyns yw hy esel a’n cowethyans na felha. Yth hevel ytho fatell wrug gwainya an Ewrodhyscryjygyon pò ‘Eurosceptics.’ Res yw perthy cov, bytegyns, fatell usy an bobel yonk moy faverus dhe’n tybyans a Ewrop udnys ès an denythyans cotha. Ny woryn ny ytho pandra a vydn wharvos i’n bledhydnyow usy ow tos. Mater aral a bris yw an dra gelwys gorotham an aireth pò ‘the climate crisis.’ Yma lies huny ow cresy fatell usy mab den hag ev ow skîtya dioxîd carbon aberth i’n airgelgh ow chaunjya an aireth rag nefra. An bobel-na a grës bos res strotha an ûsyans a gunys omgaregys pò ‘fossil fuel’ in kerry tan rag ensampyl hag in tredanvaow pò ‘power stations.’ Indella y hyll bos lettys pò dhe’n lyha lent’hës tesyans an norvës. Nyns yw kenyver onen perswâdys a’n peryl bytegyns. Yma radn ow remembra in bledhydnyow deg ha try ugans an gansvledhen dhewetha fatell vedha an arbenygoryon ow profusa y whre an bÿs yêynhe kyns ès tobma. An re-na nag yw perswâdys a’n gorotham in aireth yw airethdyscryjygyon pò ‘climate sceptics’. Mater aral neb a veu i’n nowodhow agensow yw an qwestyon a ‘anti-Semitism’ pò stauns gorth-Yêdhow pò ‘anti-Semitic’ i’n Party Lavur. Wàr an tenewen aral y feu croffolys fatell esa ‘Islamophobia’ in Party an Mentênours. Dell yw ûsys, in Sowsnek pàn vo ‘-phobia’ an secùnd element in ger, yma va ow styrya ‘fear, own’, rag ensampyl in ‘claustrophobia’ pò closown, hag in ‘agoraphobia’ pò strêtown. In câss ‘Islamophobia,’ bytegyns nyns yw an radn ‘-phobia’ ow mênya ‘own’, kyns ès fowt a gerensa pò, ‘hatred.’ Onen a’n geryow rag ‘to hate’ ûsys gans Tregear yw hâtya. Pelha in Passio Christi ny a red an lavar Sarsyn pò Yêdhow kyn fo ‘though he were a Saracen or Jew.’ Yma Sarsyn ena ow styrya Moslem. Ytho rag ‘Islamophobia; me a vynsa comendya Sarsynhâtyans; ha’n den gylty a’n dra a via Sarsynhâtyor. Heb mar in agan dedhyow ny, gwell yw sevel orth leverel tra vëth a vynsa offendya pò hùrtya nebonen aral, na fors pana vagas a vo va ow longya dhodho. Res yw dhyn bos ‘politically correct.’ Onen a’n geryow Kernowek rag ‘politics’ yw gwlasegeth, ha ‘correct’ yw kewar. Ytho rag ‘politically correct’ me a vynsa comendya gwlaskewar. An mater moyha a bris i’n present termyn heb mar yw an ‘corona virus’ pò cùrunvîrùs. An vîrùs-na a veu aswonys rag an kensa pris mis Kevardhu warleny in Wûhan in Cathay. Dell hevel yma an vîrùs ow lêsa ha câssys re apperyas in lies pow. Mars usy nebonen ow cachya an vîrùs, nyns yw an peryl a re vrâs mar nyns yw y system imûneth pò ‘immune system’ gwadnhës in neb fordh. Yma an auctorytas yêhes ow teclarya, mar ny vëdh an vîrus lestys, ny dhe gafos plag bÿsefan pò ‘pandemic’. Gesowgh ny dhe besy Duw na vo an cleves re dhrog.