(218) Degol Bryjet - lovinglivingcornish

Clyckya obma ha goslowes / Click here to listen

Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

An kensa dëdh a vis Whevrel yw Degol Bryjet, in Godhalek Lá Fhéile Bríde. Yth o Bryjet benyn sans a veu genys in cres an pympes cansvledhen. Hy yw onen a dry sans brâs Wordhen warbarth gans Padryk ha Colùmba. Mar vrâs o hanow Bryjet may fedha hy traweythyow gelwys Maria an Wydhyly, ha hy a vedha consydrys mabmeth Jesu y honen. Yth yw derivys adro dhedhy fatell wrug hy pesy mytern Leinster dhe grauntya tir dhedhy rag byldya lenjy hag eglos saw nyns o va whensys. Hy ytho a besys dhyworto yn udnky myns tir a via cudhys in dadn hy clôk. Pàn acordyas ev gans hedna, hy clôk a devys dre verkyl ha cudha lies erow. An mytern a ros an tir dhedhy hag ev a drailyas ha recêva besydhyans. I’n tyller may feu byldys an eglos-na yma Pedneglos Kildare lebmyn sacrys dhe Bryjet Sans. Yma radnow a whedhel Bryjet owth apperya pagan ha scolers a grës fatell veu Bryjet an sanses Cristyon kemyskys gans duwes pagan a’n keth hanow. I’n whedhlow pagan Bríd yw an dhuwes a brydydhieth hag a greftow erel ha hy yw pòr alosek. Res yw remembra inwedh fatell yw an hanow Bryjet/Bríd y honen kelmys yn stroth gans an ger bryntyn in Kernowek ha gans brenin ‘mytern’ an Kembrek. An kensa dëdh a Whevrel yw degol Bryjet lebmyn, saw y fedha va gelwys Imbolc gans an Pagans, an kensa dëdh a’n gwaynten Keltek. An jëdh-na whath yma an Wydhyly ow qwil crows a vrodn, gelwys ‘crows Bryjet’, cros Bhríde, rag hy cregy a-ugh an daras rag dyffres an chy ha’n bestas i’n mîsyow usy ow tos. Y fedha baban gwrës a bredn ha padnow kefrÿs. Hèn o gelwys an Bhrídeog ‘imach Bryjet’ hag a vedha degys adro dhia jy dhe jy rag dry fortyn dâ ha sowena dhe’n dregoryon. Yma an semlant a baganieth wàr oll hedna. Kepar dell yw kebmyn in Wordhen yma an Gristoneth kemyskys i’n negys-ma gans an tradycyon pagan.