(219) Dùffy ha'n Jowl - lovinglivingcornish

Clyckya obma ha goslowes / Click here to listen

Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Yma lies whedhel aswonys dhyn dhyworth lyfrow an Vreder Grimm. Yma onen anodhans ow terivas a venyn yonk usy ow recêva gweres in ober pòr gales dhyworth person gornaturek. Yma hy ow soweny yn frâs erna vo res dhedhy desmygy hanow an gweresor. Versyon an Vreder Grimm yw gelwys Rùmpelstyltskyn, saw yth yw lies versyon kefys in powyow dyvers. Rag ensampyl ny a’gan beus versyon dhyworth an West a Gernow neb a veu dyllys in Sowsnek gans Robert Hunt i’n nawnjegves cansvledhen. An whedhel, gelwys ‘Duffy and the Devil,’ yw indelma. Udn jorna yma Sqwier Lovel ow passya penty Jêny Chygwyn hag ev a glôw an venyn goth ow tavasa Dùffy, hy lesvyrgh. ‘Ass yw hy diek,’ yn medh hy. ‘Ny wra hy ober vëth i’n chy saw y fëdh hy pùpprës ow ponya adro gans an wesyon yonk.’ ‘Flows!’ a lever Dùffy. ‘Yth yw ow whel vy a’n gwelha. Yth esoma ow nedha hag ow qwia gwell ès ken mowes vëth!’ Pòr deg o Dùffy ha’n Sqwier o mar blêsys gans hy semlant may whrug ev hy don ganso tre. Ena ev a’s hùmbroncas bys in tâl an chy ha ry dhedhy meneth a wlân dhe nedha. Dùffy in gwir o sygerores ha ny wodhya hy tra vëth a nedha nag a whel vëth a wil dyllas. Hy a sedhas orth an ros nedha ha cria in mes: ‘Mollath wàr an whel-ma. Re wrello an Jowl nedha rag an Sqwier!’ Dystowgh den bian du, lost forhek adhelergh dhodho, a omdhysqwedhas dhyrygthy. ‘Dùffy wheg, me a vydn gwil oll dha whel,’ yn medh ev. ‘Te a wra demedhy gans an Sqwier ha bos benyn jentyl. Saw orth pedn teyr bledhen, mar ny ylta jy desmygy ow hanow vy, te a dheu genef vy.’ Dùffy a gefy an wlân ha’n Jowl an wre hosanow ha meur a dhyllas aral. Dùffy a blêkyas kebmys dhe’n Sqwier, may whrug ev hy demedhy. An teyr bledhen a bassyas. In oll an termyn-na yth esa an Jowl ow qwil hosanow ha dyllas aral rag an Sqwier, hag ev a gresy kenyver tra dhe vos gwrës gans Dùffy hy honen. Udn jorna an Sqwier êth in mes owth helghya. Ev a sordyas scovarnak hag a’s châcyas bys in tyller dygoweth, le mayth esa gwrahas ow neyja adro dhe dan brâs. Gansans yth esa den bian du, forhek y lost. Yth esa an den du ow cana: ‘Dyscudha nefra ny wra hy: Terry Top yw ow hanow vy!’ Pàn glôwas Dùffy hedna, ny leverys hy tra vëth dhe’n Sqwier, saw ternos pàn dheuth an den bian du dhe Dùffy, ev a’s erhys dhe dhesmygy y hanow ev. ‘Osta gelwys Lûcyfer?’ ‘Nag ov. Lûcyfer yw servont dhybm.’ ‘Osta gelwys Belsebùk?’ ‘Nag ov. Belsebùk yw onen aral a’m servysy.’ ‘Osta gelwys Terry Top?’ hy a wovydnas. An Jowl, sowthenys fest a dhybarthas dhyworty, brâs y gonar. Yth esa an Sqwier wàr ves owth helghya an very termyn-na, hag oll an dyllas gwrës gans an Jowl a drailyas dhe lujow adro dhodho. Pàn dheuth ev tre, ev o yn noth ogasty. Ny golmas an Sqwier coll an dyllas bythqweth gans an Jowl. Ev a gresy an dra dhe vos gwrës gans an wragh a sordyas ev in form a scovarnak.