© 2010 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
I’n gwary Resurrexio Domini Pylat, an governour Roman yw serrys gans Josef Baramathia hag ev a’n gelow Josef canjon. Kyns ès hedna i’n gwary pàn usy Crist ow ravna iffarn, yma Tùlfryk, onen a’n dhewolow in dyspêr, hag yma va ow kelwel orth dyowl aral hag in y sorr ev a’n gelow ‘my cangeon’. I’n dhew dyller yma an ger canjon ow mênya ‘wretch; ploswas, den casadow.’ Canjon a veu kemerys aberth in Sowsnek ha Kernowek dhyworth Frynkek a’n Osow Cres. Form aral yw changeon. Hedna a veu benthygys gans Sowsnek Cres ha dasformys avell ‘changeling.’ ‘Changeling’ in gwiryoneth yw styr gwredhek an ger canjon. An styr ‘ploswas’ a dhysplêgyas in mes a hedna. Pandr’yw ‘changeling’ pò canjon poran? In crejyans an bobel canjon ‘changeling’ o flogh gorrys gans an spyryjyon in le an gwirflogh neb o ledrys gansans. Yth yw an grejyans a’n flogh gesys gans an fayes in le flogh denyl pòr gebmyn in tradycyons an bobel in pùb pow in Ewrop hag in tyleryow erel kefrÿs. Yn fenowgh y fedha an canjon talsogh, heb gallos côwsel na sevel kyn fe. Traweythyow bytegyns y fedha an canjon skentyl pur hag ev a wodhya moy ès dell o ûsys rag flogh a’y oos. In Kembra yth o an canjon poran kepar ha’n flogh denyl usy ev ow kemeres y le, saw nebes ha nebes yma va ow tevy dhe voy ha dhe voy hager; hag yma y omdhegyans ow qwethhe inwedh; an canjon yw crowsek ha dyrêwl, ha martesen yma va ow scrija heb hedhy hag ow whelas brathy esely an teylu. In Wordhen y hylly an canjon bos aswonys der y settya wàr rev ha’y sensy dres an tan. Mars o va canjon, ev a vynsa lebmel an chymbla in bàn hag indelha mos mes a wel. Yth esa an Gernowyon ow cresy i’n canjon kefrës. Pobel Eglos Madern rag ensampyl a gresy fatell ylly an canjon bos remôvys ha’n gwirflogh daskefys dre wil defnyth a’n Men Toll. In pluw Madern yma men brâs usy toll ino hag yth o cresys fatell esa spyrys dâ tregys i’n men-na. A calla an canjon bos gorrys der an toll, ena ev a vynsa mos mes a wel hag y fia an gwirflogh gesys in y le. Radn a’n flehes cresys dhe vos canjons a veu tebel-dyghtys yn fenowgh gans aga herens. In gwir yth yw recordys in powyow dyvers fatell veu mabmow ha tasow drÿs dhyrag an gort dre rêson y dhe ladha aga mab pò aga myrgh. Avell defens an bobel acûsys a leverys na wrussons y ladha an flogh. Na wrussons y ma’s ladha an dra gesys gans an drog-spyryjyon in y le. Nyns yw an tybyans a flogh dhe vos canjon ma’s fâls-crejyans dhe styrya prag nag esa an flogh ow tevy yn ewn. Dre lycklod yth esa an flogh truan ow sùffra gans onen a’n condycyons-ma: ascorn keyn feljys pò spina bifida, fybrôsys cystek, syndrôm Down, autystieth ha paljy empydnyon. In gwelha prÿs in agan dedhyow ny an vedhygyon a wor pandr’yw cabm gans an flogh truan ha dre rêson a hedna nag yw res dhe’n teylu blâmya an fayes.