(229) Covyd Nawnjek - lovinglivingcornish

Clyckya obma ha goslowes / Click here to listen

Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Dre rêson a’n cùrunvîrùs, Covyd Nawnjek, yth eson ny in Breten Veur hag in Wordhen kefrës in dadn leunstroth pò ‘shutdown’ Rag hedna me a garsa hedhyw côwsel adro dhe’n vîrùs y honen ha’n fordhow may hyllyn ny wàr an dyweth delyfrya agan honen dhyworto, pò dhe’n lyha may hyllyn ny dewheles dh’agan bêwnans ûsys. Kyns oll res yw leverel neb tra ow tùchya lydnyath pò devedhyans an vîrùs. Yma pobel i’n Stâtys Udnys hag in powyow erel ow teclarya fatell veu an vîrus gwrës dre dowl in Poblegeth Gweryn Cathay ‘the People’s Republic of China.’ Wàr an tenewen aral yma governans Cathay ow leverel fatell yw an Stâtys Udnys dhe vlâmya rag an vîrùs. Certan ywa fatell dhalathas an vîrùs in Wûhan in Cathay. Apert yw bytegyns na veu an vîrùs creatys poynt dre dowl in neb whelva Gathayan pò ‘Chinese laboratory.’ An tybyans-na yw gocky dres ehen, rag ny vynsa whythroryon in Cathay desmygy neb tra a vynsa shyndya aga fow aga honen kyns es gwil damach dhe gen pow vëth. Pelha genôm an vîrùs re beu cowl-dhielvednys pò ‘fully sequenced’. Certan yw fatell dheuth an vîrùs gwredhek dhyworth eskelly grehyn pò ‘bats.’ A pe an vîrùs genynjaunjys pò ‘genetically modified’ dre dhorn mab den, y fia sciencydhyon ow qwetyas gweles i’n genôm tôknys a gevresow nowyth pò ‘new sequences’ gorrys ajy ino dre dowl. Heb dowt vÿth nyns yw an vîrùs CovydNawnjek poran kepar ha ken vîrùsow in eskelly grehyn, saw an tyleryow mayth yw an vîrùs dyffrans dhyworth vîrùsow a’n keth sort yw spredys whym whàm dres an genôm. Yma hedna owth hyntya yn crev fatell wrug an vîrùs dysplêgya yn naturek in mes a vîrùs aral kyns ès in whelva in maner greftus. Ot obma neb tra aral. Certan jornalydhyon re screfas fatell vedha pobel sqwith yn scon a vos in dadn alwheth in tre kyns ès mos dh’aga whel wàr ves. Nyns yw hedna gwir yn tien naneyl. Yth hevel fatell usy meur a bobel ow cafos meur a blesour a’n degolyow constrînys, hag y âbyl dhe spêna meur a dermyn gans aga flehes. Obma in Dulyn rag ensampyl golok kebmyn ywa gweles teylu—tas, mabm ha flehes ow tywrosa warbarth adro, neb tra na vedha gwelys yn fenowgh dhyrag an leunstroth. Tabm ha tabm yma an leunstroth ow lowsya nebes. Pàn na vo câss nowyth vëth recordys dres nebes dedhyow, ena salow vëdh dewheles dhe’n bêwnans coth gans certan rag-ambosow. Saw ny vëdh an vîrùs gyllys dhyworth fâss an norvÿs. Ny vëdh CovydNawnjek overcùmys gans mab den erna vo dyw dra dhyn: onen: breghlyn pò ‘vaccine’ yw godhvedhys dhe wetha rag an vîrùs ha nag usy ow qwil damach vÿth y honen; dew: droggys gorthvîrek a yll yaghhe nebonen clâv gans an vîrùs pò dhe’n lyha y wetha yn few erna wrella y gorf sawya y honen. Ny vëdh an vîrùs gyllys bytegyns. Martesen an govenek gwelha a via hebma: an vîrùs dhe dysplêgya yn naturek bys i’n poynt na vo va mar venemys dell ywa i’n tor’-ma.