(24) Jeanne Calment - lovinglivingcornish

Clyckya obma ha goslowes / Click here to listen

Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Jeanne Louise Calment a veu genys in mis Whevrel mil eth cans seyth deg pymp in Arles in Soth a Frynk. Pan o hy udn vledhen warn ugans, hy a dhemedhas secùnd cosyn dhedhy henwys Fernand Calment. Fernand o merchant rych hag ytho ny veu res bythqweth dhe Jeanne lavurya rag hy bêwnans. In le a hedna hy a’s teva lies hobba, tenys, dywrosa, neyja, roskyjya (pò roller-skating), gwary an piano hag opera. Gour Jeanne a verwys pàn o va seyth deg ha teyr bloodh awos fyt a venymyans boos. Ny veu ma’s udn flogh dhedhans, aga myrgh Yvonne. Yvonne a dhemedhas hag a gafas udn mab, Frédéric. I’n gwetha prës Yvonne a verwys pàn nag o hy ma’s try deg ha whegh bloodh. Nyns o Fréderic, mab Yvonne ha mab wydn Jeanne, ma’s eth bloodh pàn verwys y vabm, ha Jeanne hy honen a’n magas. Frédéric a devys in bàn hag a veu medhek, saw ev a verwys heb flogh ha heb demedhy, pàn o va try deg ha whegh bloodh. I’n vledhen mil whegh deg ha pymp Jeanne Calment o naw deg bloodh coth. Nyns o er vëth dhedhy a ylly hy gasa hy ferhenogeth dhodho. Rag hedna hy a worras hy dorn dhe gevambos gans laghyas henwys André-François Raffray. Herwyth an acord Raffray a wre tylly dhedhy pùb mis teyr mil ha pymp cans franc (adro dhe try hans puns sterlyng) erna wrella hy merwel, ha warlergh hy mernans ev a wre cafos hy rannjy teg. Pàn wrug ev sîna an acord gans Jeanne, Raffray o peswar deg ha seyth bloodh. Deg bledhen warn ugans moy adhewedhes Raffray a verwys a ganker hag ev seyth deg ha seyth bloodh. Yth esa Jeanne wàr an tenewen aral whath ow pewa, ha hy o cans hag ugans bloodh. Res o dhe wedhowes Raffray pêsya gans an pêmons dres dyw vledhen moy, erna wrug Jeanne merwel. In y vêwnans an laghyas a wrug tylly dhe Jeanne adro dhe udn cans ha deg mil puns, moy ès dywweyth valew an rannjy, kyn na wrug ev y gafos bythqweth. Jeanne a wre dywrosa yn rewlys erna veu hy cans bloodh. Hy a dhalathas gwary cledha pò fencing pàn o hy peswar ugans ha pymp. Pòr goynt martesen, hy a wre debry moy ès dew buns a joclets kenyver seythen. Hy a verwys wàr an dyweth i’n vledhen mil naw cans naw deg seyth ha hy moy ès udn cans dew warn ugans bloodh. Mar bell dell woryn ny, jorna hy mernans, hy o an person cotha bythqweth a veu.