(243) Ôlaf - lovinglivingcornish

Clyckya obma ha goslowes / Click here to listen

Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Adro dhe hanter-mildir dhyworth agan chy in Dulyn Soth yma tyller gelwys ‘Balally.’ An hanow gwredhek in Godhalek yw Baile Amhlaoibh ‘Tre Ôlaf.’ Ôlaf i’n hanow-ma o Vîkyng ha kensa mytern Vîkyngas Dulyn. Dell hevel ev a fùndyas dynas i’n côstys-ma ha’n dynas a ros an hanow dhe Baile Amhlaoibh. Ôlaf, mytern Dulyn, a verwys in Bledhen agan Arlùth naw cans ha peswar deg onen. Scol elvednek a veu egerys in Balally in dadn scoos an eglos Catholyk Roman in bledhydnyow try ugans an gansvledhen dhewetha hag y feu an hanow ‘St Olaf’ rÿs dhedhy. Dell hevel y feu an hanow ‘St Olaf’ ûsys dre rêson a’n scol dhe vos in Balally ‘Tre Ôlaf’. In gwiryoneth bytegyns nyns o Sen Ôlaf an keth den avell Ôlaf Balally, saw den dyffrans yn tien. Sen Ôlaf, Ôlaf Haraldson pò an Secùnd Ôlaf, o mytern Norgagh dhyworth an vledhen mil ha pymthek bys mil hag êth warn ugans. Ôlaf a gresy y vos y dhevar udnya Norgagh in dadn udn mytern; indelha ev a wrug omlath yn crev rag collenwel an towl-na. Ev a vatalyas in Norgach hag avês dhe’n wlascor in powyow an Mor Baltek, in Denmark hag in Pow an Sowson. I’n pow-na ev a gemeras part in batel warbydn Cnût, mytern Denmark ha Pow an Sowson. Cnût o escar brâssa Ôlaf dres lies bledhen. Cnût a veu fethys i’n vatel ha’n gùrun restorys dhe Eldred Dygùssul pò ‘Æthelred the Unready.’ Ny veu Cnût ledhys bytegyns. Wàr an dyweth i’n vledhen mil ha deg warn ugans Cnût gans gweres meur a vryntynyon Norgagh, neb a drailyas warbydn Ôlaf, a omladhas batel Stiklestad warbydn Ôlaf, hag Ôlaf a veu ledhys. Kynth o Ôlaf milus ha garow in y omdhegyans, bledhen wosa y vernans y feu va gwrÿs sans a’n eglos gans y goweth, Grimkell Epscop. Y feu an canonîsans-na aswonys gans an pab, an Tressa Alexander, cans bledhen moy adhewedhes. Dhyworth an termyn-na Sen Ôlaf a veu sans a’n eglos Catholyk yn tien. Awos oll y fowtys avell person ha mytern, pobel Norgagh a wre onora an remembrans a Ôlaf dre rêson ev dhe fastya dres ugans bledhen anserhogneth Norgagh dhyworth an Danow. Apert yw fatell wrug Ôlaf whelas dhe restry ha dhe ledanhe gallos an eglos in Norgagh, ha kynth yw an mater dyspûtys, yth hevel fatell weresas ev ow crefhe an Gristoneth in y wlascor. Yn scon warlergh y vernans y feu Ôlaf aswonys avell sans tasek Norgagh. Devôcyon dhodho a lêsas dres oll Loghlyn ha dhe’n powyow mayth o anedhys meur a Vîkyngas. Yma eglosyow sacrys dhodho in Loundres hag in Evrok. Y feu eglos sacrys dhodho in Keresk dhyrag goreskyn an Normans hag y fedha gelwys wàr an sans in letanys in Penneglos Keresk i’n keth termyn-na. Sacrys dhe Sen Ôlaf inwedh yw eglos an bluw in Poghwell pò Poughill in Kernow North-Ÿst ogas dhe Bûd. Dell hevel, y feu an eglos sacrys dhodho warlergh an conqwest Norman. Heb mar yth o an Normans Vîkyngas herwyth devedhyans. Y fedha degol Ôlaf solempnys in Poghwell De Halan Ëst bys i’n êtegves cansvledhen hag yth o an jorna gelwys Tooleda, hèn yw St Olaf Day.