(247) Nicholas Boson - lovinglivingcornish

Clyckya obma ha goslowes / Click here to listen

Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Nicholas Boson o den jentyl ha marchont. Ev a veu genys in Lulyn i’n vledhen mil whe cans dew dheg peswar. Edward Lhuyd a lever dhyn fatell gavas ev gweres gans an tavas Kernowek in mesk pobel erel dhyworth ‘Nicolas Boson a Neulyn in pluw Pawl.’ Boson a gavas scolyans dâ; hèn yw apert dhyworth y scrif Nebes Geryow adro dhe Gernowek, le mayth usy ev ow ry dhyn devydnow mes a’n screforyon Latyn Awsônyùs ha Horâs; cler ywa inwedh dhyworth an keth scriven fatell o redys ganso Montaigne, an auctour Frynkek. Saw Boson a dherif na ylly ev clappya ger vëth a Gernowek erna veu va whe bloodh, rag y vabm a dhyfednas an servysy ha’n gentrevogyon dhe gôwsel tavas vëth dhodho marnas Sowsnek yn udnyk. Dell hevel hy a gresy nag o compes ragtho côwsel Kernowek, drefen y vos a rencas uhelha ès an bobel gebmyn esa ow côwsel Kernowek adro dhodho. Awos dyfen y vabm Nicholas Boson a dhescas an tavas hag a screfas ino. Ev a’n jeva peswar flogh, Nicholas, Jowan, Maria ha Benjamyn. Y oll a veu genys inter mil whe cans pymp deg try ha mil whe cans whe deg onen. Ev a screfas whedhel ragthans in dadn an tîtel ‘The Duchess of Cornwall’s Progress.’ pò Cors Dùches Kernow. An Dùches i’n tîtel yw Cattern Gordon, gwre’ty Perkyn Warbeck, den a glêmyas falslych orth dyweth an pymthegves cansvledhen ev dhe vos mab yonca an Peswora Edward hag ytho mytern lafyl Pow an Sowson. Cattern a spênas termyn i’n Garrek Loos i’n Coos in west a Gernow. Cors an Dùches a veu screfys gans Nicholas in Sowsnek saw yma darnow anodho in Kernowek. Nyns yw cowl-dext sensys, saw apert yw fatell screfas Nicholas an dra rag desky y flehes neppÿth a istory an tavas Kernowek hag a lien gweryn Kernow. Yth hevel fatell o descans Nicholas a brow rag y flehes, rag Jowan, y secùnd mab, a veu scolor a’n tavas Kernowek hag a dhescas Kernowek dhe dus erel. Yth yw text aral ascrîbys dhe Nicholas Boson, hèn yw Jowan Chy an Hordh. Yma an kensa radn kefys in dornscrefa Jowan Boson hag y feu oll an whedhel pryntys gans Edward Lhuyd. Lhuyd a lever fatell veu va screfys adro dhe dhew ugans bledhen alebma. Hedna a via adro dhe mil whe cans whe deg pymp, re avarr rag Jowan dhe vos an auctour. Yma scoloryon agan dedhyow ny ow soposya fatell o Nicholas Boson a screfas an drolla. Jowan Chy an Hordh yw versyon a’n whedhel kesgwlasek An Teyr Hùssul, usy versyons anodho kefys in Wordhen, Scotlond, Jermany, Italy hag in powyow erel. Yth hevel fatell veu an whedhel gwredhek Kernowek composys dhyrag an Reformacyon. Me re gampollas solabrÿs scrif Nicholas Boson moyha a les, hèn yw Nebes Geryow adro dhe Gernowek. Herwyth an text-na, nyns o Kernowek côwsys in secùnd hanter an seytegves cansvledhen ma’s in pow idn in very west a Gernow. A les ywa bytegyns fatell esa den deskys dâ avell Nicholas Boson ow qwil attent dhe selwel an tavas. In Nebes Geryow yma Boson, dell welsyn ny solabrës, ow qwil mencyon a Dyck Angwyn. Kyn nag usy ev ow compla y hanow, yma va ow referrya dhe Jowan Keigwyn kefrÿs. Res vëdh dhybm leverel neb tra adro dhe Keigwyn i’n termyn usy ow tos.