© 2020 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
Wostallath Kembro o an Kernowek rag ‘Welshman.’ Yma an form-na dhe weles i’n hanow personek Walter Kembro ‘Walter the Welshman’ dhyworth dallath an peswardhegves cansvledhen. Yth ywa dhe verkya whath in hanow tyller Chykembro in Eglos Senar dhe’n west a Porth Ia. In y dhevedhyans Kembro yw an keth ger avell Cymro ‘Welshman’ in Kembrek. Ymowns y aga dew ow tos dhyworth ragform *Kombrogos ‘kestrevesyk, fellow-countryman.’ Hèn o hanow a veu rÿs gans an Brethon dhodho y honen in dedhyow dewetha an empîr Roman in Breten Veur, rag decernya intredho y honen ha’n Godhal, rag yth esa Gwydhyly ow tos in nùmbers brâs dhyworth Wordhen dhe Vreten dhe vos anedhys inhy. In Kembrek Cymro i’n liesek yw Cymry, hanow usy ow styrya dew dra dhyblans: ‘Welshmen’ ha pow an ‘Welshmen; Wales.’ In Kembrek agan dedhyow ny yth yw an dhyw styr-na dysqwedhys dre dhyffrans a spellyans, saw y aga dew warlergh tardhans yw an keth ger. In Kernowek an form avarr Kembro a dhysplêgyas dhe Kembra. Yma Borlase ow ry Kembra ‘a Briton’ ha Chy an Kembra ‘House of the Briton’. Dre lycklod liesek Kembro, Kembra wostallath o *Kembry ‘Welshmen, Wales’. Hag in gwir *Kembry yw an form faverys gans Nance avell hanow an pow. Yth hevel bytegyns fatell dhysplêgyas *Kembry in Kernowek avell Kembra. Ny a wor hedna rag yma Kembra ‘Wales’ kefys dywweyth in Bewnans Ke hag yma Lhuyd inwedh ow screfa Kembra, Kimbra rag ‘Wales.’ Yma hedna oll ow styrya nag esa dyffrans vÿth in Kernowek inter Kembra ‘Welshman’ ha Kembra ‘Welshmen, Wales.’ Rag goheles an peryl a sowthan in Kernowek, an liesek a veu dasformys dhe Kembrion ‘Welshmen,’ form neb yw destys gans Lhuyd ha Borlase. Ytho in Kernowek ny a’gan beus Kembro, Kembra ‘Welshman’, Kembra ‘Wales’ ha Kembrion ‘people of Wales, Welshmen.’ In Kembrek an ger rag tavas Kembra yw Cymraeg dhyworth *Kombrogika. Yma an pooslev wàr an secùnd sylaben. In Kernowek wàr an tenewen aral yth hevel fatell veu an gorfen ger -ek gorrys dydro wàr an stock Kembr- dhe ry Kembrek. Nyns eus ma’s udn exampyl a hedna i’n tavas hengovek. In lyther screfys dhe Wella Gwavas i’n vledhen mil seyth cans udnek yma Oliver Pender ow comparya Kernowek Gwavas gans Kernowek Lhuyd. Pender a lever: Rag na alja ev clappya na screfa Kernowek pecar ha why. Th’era moy Gembrek pëth wrug ev gwil. A les ywa an kensa kes-son in Gembrek dhe vos trailys dhyworth K dhe G. Yma certan re ow styrya an trailyans dre redya a ‘of’ inter moy ha Gembrek, hèn yw ‘more of Welsh.’ Ny worama bytegyns yw gwir hedna. I’n textow hengovek ny a gav moy pegh ‘more sin’, moy dysenour ‘more dishonour’, moy tresour ‘more treasure’, moy drog ‘more evil’ ha moy pain ‘more pain,’ y oll heb trailyans vëth wàr an kensa kes-son warlergh moy. In Kembrek an ger Cymraeg yw benow warlergh an ger-mell pò ‘definite article’ hag ytho an form yw y Gymraeg ‘the Welsh language.’ Martesen yth esa neb tra kepar owth obery gans an ger Kembrek in Kernowek. Martesen warlergh an ger mell an yth o Kembrek benow. Hedna a vynsa ry an *Gembrek. Ena an trailyans medhel a veu gwrÿs parhus pò ‘permanent.’ Trailyans medhel parhus yw kefys orth dallath geryow erel in Kernowek.