(272) Le, plâss, tyller - lovinglivingcornish

Clyckya obma ha goslowes / Click here to listen

Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

I’n tavas tradycyonal yma try ger usy an keth styr dhodhans ogasty, le, plâss ha tyller. In y dhevedhyans yth yw le in Kernowek an keth ger avell lle in Kembrek ha lec’h in Bretonek. Nyns yw an ger le kefys ma’s in lavarow stag, hèn yw dhe styrya ‘in set phrases.’ Ytho i’n textow ny a gav lies le, rag ensampyl in In ketella yth yw res, dell redyer in lies le, dhe Vab Duw godhaf i’n bës hag entra dh’y lowena (Passio Christi). Yma an lavar lower le kefys inwedh: An bedhow in lower le apert a veu egerys ha’n corfow esa inha a veu in bàn drehevys (Passyon agan Arlùth). Ny a gav pùb le, rag ensampyl in: Deun ny the dre ha leveryn in pùb le dell welsyn ny Jesu dhe vos dasserhys (Resurrexio Domini). Kebmyn lowr kefrÿs yw an lavar i’n le may ma, rag ensampyl: Gwrewgh y gronkya torr ha keyn worth an post i’n le may -ma (Passio Christi). Yma py le pò ple kebmyn magata: Kepar ha dre an geryow a Dhuw ny a wor py le a veu paradîs plynjys (Tregear) ha Caym, lavar ple ma Abel, dha vroder ow servont lel; prag nag usy ev genes? (Origo Mundi). Heb mar yma an element le dhe weles kefrÿs in alemma, alebma hag in alena. Res yw perthy cov nag yw le ûsys nefra avell ger frank ino y honen ha na’n jeves an ger form liesek vëth. An formys liesek *leow ha *leyow campollys gans Nance yw desmygyans pur. An secùnd ger yw plâss. Yth yw hedna ûsys in lavarow stag: rag ensampyl: parys prest yw dha vercy dhe’th servont sur in pùb plâss (Resurrexio Domini); rag ny glêwsowgh in neb plâss sawor a’n par-ma bythqweth (Origo Mundi); py plâss y hyll e dybry, ev hag oll y dhyskyblon? (Passio Christi). Nyns yw an ger plâss haval dhe le bytegyns rag y hyll ev bos ûsys ganso y honen, rag ensampyl: rag cola worth unn venyn glân ev re gollas an plâss a’m leuv dhyhow (Origo Mundi). Saw kepar ha le ny’n jeves an ger plâss form liesek vÿth. An tressa ger yw tyller. Yth yw tyller ûsys in lavarow stag, rag ensampyl: in pùb tyller dres an vro (Passyon agan Arlùth); yma Sèn Powl worth agan paintya ny in mes in colors in lies tyller i’n scryptour (Tregear); py tyller yma Moyses ha py cost yma tregys? (Origo Mundi). Saw y hyll tyller bos ûsys avell hanow frank, rag ensampyl in An Jowl a drailyas spyrys hag êth dh’y dyller teythy (Passyon agan Arlùth). Yma dyffrans brâs inter le ha plâss wàr an eyl tu ha tyller wàr y gela. Yma form liesek tyller destys dywweyth: i’n lyfrow dell yw scrifys dhe’n ëdhyn gwyls rag neythy tyleryow esa parys (Passyon agan Arlùth) ha Oll an tylyryow-na i’n scryptour a gotha perswâdya colonow an bobel neb yw dâ (Tregear). Rag hedna pàn vyma ow côwsel adro dhe henwyn wàr an mappa, me a lever henwyn tyleryow.