© 2021 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
Yma tre vian in Dulyn Soth henwys Dalkey. In Dalkey yma fordh gelwys ‘Atmospheric Road’ (in Godhalek Bóthar Atmaisféarach). An rêson rag an hanow-na yw hebma: i’n nawnjegves cansvledhen y feu hens horn gwrës dhyworth cres Dulyn bys in Dalkey hag i’n radn dhewetha anodho dhyworth Kingstown dhe Dalkey (pellder udn vildir ha try qwarter) res o dhe’n train mos in bàn serth lowr oll an fordh. Cales o rag jynys êthen an dedhyow-na gwil an viaj yn êsy. Rag hedna in le ûsya jyn êthen, an train a vedha gorrys in rag dre wascas air. Pàn wrella an train dhyworth cres Dulyn drehedhes gorsaf Kingstown, y fedha pyston wàr an dor kelmys gans an jyn a-ughto. An pyston o settys in pib a horn esa ow mos inter an dhyw glethren oll an fordh dhyworth Kingstown dhe Dalkey. Yth esa pùmp êthen in Dalkey neb a wre pùmpya an air in mes a’n bib dhe wil gwagla pò ‘vacuum’ inhy. Ena pàn vedha relêssys an frodn, gwascas an air adhelergh dhe’n pyston o creffa ès an gwagla dhyragtho, ha’n gwascas-na a wre herdhya an jyn ha’y gôchys in rag dhyworth Kingstown bys in Dalkey. Dre rêson an pellder dhyworth Kingston dhe Dalkey dhe vos owth ascendya pùpprÿs, y hylly an viaj dewheles bos gwrÿs gans nerth dordhynyans pò ‘gravity’ yn udnyk. Y fedha lappa lether wàr an toll i’n bib oll an fordh, saw y fedha problem gans hedna traweythyow rag nyns o possybyl gwetha an bib airstanch pùpprÿs. Y feu hens horn airgelhus Dalkey egerys i’n vledhen mil naw cans peswar deg peswar* ha’n train a wrug obery bys pedn deg bledhen. Ena y feu gwrÿs jynys êthen a ylly tedna côchys an leder in bàn moy êsy. Kyn feu an tybyans a drainys gwagla forsâkys i’n nawnjegves cansvledhen, yth hevel fatell eus pobel arta in agan dedhyow ny ow tyby adro dhe drainys herdhys in rag dre wagla. Yma cowethasow in dyvers powyow ow predery adro dhe sort nowyth a drain rag kelmy dyw cyta, Los Angeles ha San Francisco pò Dùbay ha’n Emîredhow Arab, rag esampyl. An profyans a via indelma: y fÿdh an train y honen ow resek ajy dhe bib vrâs ha gwascas air isel inhy. Y fÿdh an viajyoryon esedhys aberth in cûth gwaskedhys. Y fÿdh an cûth lyftys in bàn dhywar an clethrednow dre dednveyn, ha herdhys in rag dre dednveyn erel. Y fÿdh an bib hy honen byldys wàr beulyow a-ugh an dor. Dre rêson a’n gwascas isel ha’n cûth dhe vos ow resek a-ugh an clethrednow heb aga thùchya, lehës vëdh an rùttyans pò ‘friction’ ha’n drailyans pò ‘drag’ yn frâs. Awos hedna an train a vÿdh ow resek uskyssa ès airen, hag indelha ow cot’he an termyn a vÿdh res rag an viaj. Train a’n sort-na yw gelwys Hyperloop ha pòr gostly yw y vyldya. Nyns eus Hyperloop vëth ow resek whath, saw dre lycklod ny a welvyth an kensa sompel yn scon.
* Nôten: mil naw cans peswar deg peswar heb mar yw errour rag mil eth cans peswar deg peswar.