© 2014 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
Kesen, form liesek kesow, yw kebmysk a vater losowek hanter-pedrys a gefyr in towarhegow pò ‘peatlands.’ Yma kesow dhe gafos in lies pow in North a Ewrop in tyleryow dowrak, le mayth usy an glebor ow lettya oxyjen dhyworth an air entra i’n mater losowek ha gwil dhodho pedry. Yth yw pò yth o kesow ûsys yn fenowgh avell cunys. Res yw kyns oll trehy an towargh gans pal arbednyk ow qwil blockys bian anodhans. Gesys yw an darnow ena dhe seha i’n howl. Pàn vowns y degys tre, y yw por dhâ avell cunys rag gwil tan dres an gwâv. Y fedha kesow trehys rag cunys in Kernow in termyn eus passys. Ny a wor hedna dhyworth lavar gwethys in lyver Pryce: whelas tus dhe drehy kesow ‘look men to cut turf.’ In Wordhen yth o hag yth yw kesow ûsys dres oll an pow avell cunys. Yma whath teyr thredanva pò ‘power stations’ usy ow lesky kesow rag gwil tredan, ha tra ûsys yw gweles cruach mhóna pò crug kesow avês dhe dreven tiogow. Yma cowethas hanter-stât in Wordhen henwys Bord na Móna pò ‘Kesva an Gesen.’ Ymowns y ow trehy kesow avell dywysygneth hag ow qwasca towarhen warbarth rag gwil bryckys bian kesow. Yth yw an bryckys-na gwerthys dres oll an pow avell cunys rag treven pryveth. In Wordhen ogas dhe hanter an towarhegow re beu remôvys gans trehoryon, Bord na Móna comprehendys. Yma towarhegow ow provia omgelgh pò ‘environment’ arbednyk rag plansow hag ÿdhyn, ha dre reson a hedna yma an auctorytas Ewrôpek ow whelas gwetha an towarhegow neb yw gesys in powyow an Udnyans. In Wordhen dre rêson a ervirans an Udnyans Ewrôpek dyfednys lebmyn yw trehy kesow in certan tyleryow ha res yw aqwytya an berhenogyon rag an coll. Saw nyns yw kenyver onen pÿs dâ bytegyns. Pobel re beu ow keskerdhes nans yw termyn warbydn an rêwlys nowyth ow tùchya trehy kesow. Y feu is-dêwysyans po ‘by-election’ in West a Wordhen in dallath mis Hedra hevleny ha gwainys veu an esedhva gans ombrofyor anserhak Michael Fitzmaurice. Ev yw caderyor cowethas leek a drehoryon kesow hag yma va owth omlath rag gwiryow pobel Wordhen dhe drehy kesow rag aga ûsyans aga honen in aga thowarhegow aga honen. Bern yw an qwestyon-ma dhe’n bobel hag yth hevel na wra an cudyn voydya yn scon.