© 2014 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
An seytegves dëdh a vis Merth yw Gool Padryk. Degol brâs ywa rag an eglos Catholyk in Wordhen ha rag Eglos Wordhen kefrës, hòn yw, an Eglos Anglycan in Wordhen. Dëdh brâs leg (secular) yw Degol Padryk i’n Stâtys Udnys in mesk Godhal-Amerycans. Y fëdh sensys keskerth in lies cyta. Keskerth Boston ha keskerth Evrok Nowyth yw an dhew moyha a vris martesen. Restroryon an dhew geskerth a lever bos gwir gans tus gay ha gans benenes lesbyan keskerdhes, saw nag yw an gwir dhedhans keskerdhes avell gays ha lesbyanesow. Yma hedna ow styrya na vëdh gwir dhedhans kerdhes in dadn baner usy ow teclarya y dhe vos keskowethyans gay. An restroryon a gafas an gwir dhe dhyghtya gays ha lesbyanesow indelma der ervirans an Gort Uhella i’n vledhen mil naw cans naw deg ha pymp. Porposys yw mer Boston ha mer Evrok Nowyth boycottya an keskerth in aga cytas hevleny dre rêson na vëdh kescowethyansow gay alowys dhe geskerdhes. Y fëdh lies gwlasegor (politicians) dhyworth Wordhen i’n Stâtys Udnys rag an Degol. Joan Bùrton, menyster dhyworth Party Lavur in governans Wordhen a lever hy dhe voycottya keskerth Evrok Nowyth awos an dyfen. Enda Kenny, bytegyns, an taoiseach pò penvenyster, a lever y whra va kemeres radn in keskerth Evrok Nowyth. Kenny a lever Degol Padryk dhe vos dëdh rag rejoycya adar rag gwlasegeth. Nyns yw pùbonen acordys ganso. Nebes menegydhyon (commentators) a gampollas bos lies Godhal gay i’n Stâtys Udnys, dre rêson y dhe forsâkya Wordhen dre dowl rag aga bêwnans in Wordhen dhe vos re gales gansans. I’n termyn eus passys nyns esa meur godhevyans obma rag pobel gay. Mar ny vëdh gays alowys dhe geskerdhes avell gays i’n Stâtys Udnys, nena martesen lies Amerycan a vydn cresy pobel Wordhen aga honen dhe vos escarus dhe dus gay. Hedna a alsa martesen gwetha biochemyst pò informategor (computer expert) a’n gradh uhella dhyworth dos dhe Wordhen rag lavurya dre rêson ev dhe vos gay. Indella a vydn cowethasow Amerycan settya in bàn aga negys in Wordhen? Yth yw geseth (irony) nag yw pobel Wordhen hedhyw i’n jëdh mar gonservatyf avell Gwydhyly Ameryca. Rag ensompel yth hevel bos scodhyans crev in Wordhen rag maryach gay, qwestyon a vëdh settys dhyrag an bobel in gwerynvôta i’n vledhen usy ow tos.