(29) Hugo Boss - lovinglivingcornish

Clyckya obma ha goslowes / Click here to listen

Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Hugo Boss yw cowethas Jerman usy shoppys dhedhy dres oll an bÿs hag usy ow qwil meur a negys wàr lînen inwedh. Y yw onen a’n cowethasow brâssa dasqwertha pò retail in oll an bÿs. An radn moyha a bris a’ga negys yw dyllas gwesyon, saw in mesk taclow erel ymowns y ow qwertha dyllas benenes, eskyjyow, gwara lether ha spectaclys. Pednplas an gowethas yw Metzingen in Baden-Württemberg in Jermany. Yma an gowethas ow qwertha valew try poynt peswar byllyon dollar kenyver bledhen hag owth arveth ogas dhe dredhek mil berson. Res yw consydra Hugo Boss dhe vos spêda brâs. An gowethas a veu fùndys gans Hugo Boss in Metzingen i’n vledhen mil naw cans dew dheg peswar, saw dre rêson a Goodh Wall Street ev a veu banksqwattys. Ev a wrug acord gans y dhettoryon pò creditors a alowas dhodho sensy whegh jyn gwrias, hag ev a dhalathas y negys arta. An vledhen o mil naw cans try deg onen. An keth bledhen-na Hugo Boss a jùnyas party an Nazis hag ev a veu esel inwedh a gescowethyansow kelmys gans an party. Awos y golmow gans an Nazis y negys a floryshyas. Cowethas Hugo Boss a wrug oll an unformow pò uniforms rag an Sturmabteilung, rag an SS, rag Yowynkneth Hitler ha rag bagasow erel. I’n secùnd gwerryans an bÿs y gowethas a wrug devnyth a lavur prysners a werryans hag a lavur kethyon pò slave labour dhyworth powyow conqwerrys gans an Jermans. Warlergh an gwerryans, dre rêson a’y vos esel avarr a barty an Nazis, ha dre rêson ev dhe dhendyl mona dhyworth an SS ha dhyworth an party, Boss a veu henwys avell scodhyor ha benfysek a Socyalieth Nacyonal. In brusyans a veu rës i’n vledhen wosa dyweth an gwerryans, y wiryow vôtya a veu kemerys dhyworto ha res o dhodho tylly cans mil mark avell spal. Ev a verwys dyw vledhen wosa hedna hag ev clâv gans postem dans pò tooth abscess. Hanter-cans bledhen moy adhewedhes warlergh meur a gâssys laha, y feu settys in bàn i’n Stâtys Udnys arhas pò fund scodhys warbarth gans Governans Jermany ha gans cowethasow pryva Jerman rag aqwîtya an prysners ha’n wonesyjy keth a wrug lavurya rag an Nazis. Cowethas Hugo Boss a agrias dhe gemeres part i’n arhas-ma hag a wrug tylly moy ès udn myllyon dollar Amerycan aberth ino. Hugo Boss trehor a verwys lies bledhen alebma saw yth yw y negys ha’y hanow whath yn few.