© 2015 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
Me a veu agensow in Ballina (Béal an Átha) i gConteth Mayo in West a Wordhen. In cres an dre yma men cov settys in bàn rag remembra Bledhen an Francas ‘the Year of the French’ (Bliain na bhFrancach in Godhalek). Wharvedhyans a bris brâs o hedna in Conteth Mayo. I’n vledhen mil seyth cans naw deg onen y feu fùndys in Belfast Cowethas an Wydhyly Udnys pò ‘Society of United Irishmen’. Inspirys gans tybyansow Wheldro Frynk pò ‘the French Revolution’, an Wydhyly Udnys o temprys lowr wostallath hag y ow whelas udnya pobel Wordhen, bêns y Anglycans, Presbyteryans pò Catholygyon in dadn an hanow kebmyn a Wydhyly. Y feu scorednow a’n gowethas growndys in Dulyn hag in tyleryow erel inwedh. Warlergh termyn, bytegyns, towlow an gowethas a jaunjyas hag y a whelas terry yn tien an colm inter Wordhen ha Pow an Sowson ha fastya repùblek anserhak. In gwaynten an vledhen mil seyth cans naw deg eth yth esa moy ès dew cans hag eth deg mil esel a’n gowethas in Wordhen; in mis Me an vledhen-na y a rebellyas warbydn an Governans. An auctorytas a wodhya adro dhe’n pëth esa ow mos dhe wharvos hag y o parys. Yth esa soudoryon an Governans ow spêdya dhe gompressa an rebellyans, pàn wrug an Jeneral Jean Humbert in mis Est tira in Killala, ogas dhe Ballina, gans nebes moy ès mil soudor Frynkek dhe weres an rebellyans. Ost Hùmbert a veu jùnnys gans teyr mil bodhak leek pò ‘local volunteers’ ha warbarth y settyas in bàn repùblek Connaught. Pòr got o sowena an rebels bytegyns rag in mis Gwydngala soudoryon an Governans a fethas an rebels yn crev in Conteth Longford hag indella sqwattya an sordyans. Nebes bledhydnyow wosa hedna, pàn wrug Napoleon entra Jermany, y army ev a veu wolcùbmys avell lyfryoryon, saw warlergh nebes bledhydnyow in dadn rewl an Francas, yth esa pobel Jermany ow meras orth an Francas avell mêstrysy sevur hag y a drailyas wàr aga fydn. An keth tra a vynsa wharvos in Wordhen mar teffa an Francas sêsya oll an pow in Bledhen an Francas.