© 2015 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
William Sydney Clements a veu genys in dallath an nawnjegves cansvledhen. Ev o offycer yonk i’n lu pàn godhas margh warnodho. An droglabm a’n tebel-pystygas hag ev o cloppek remnant y vêwnans ha tormentys gans pain anhedhek. Pàn verwys y das in cres an gansvledhen, ev a veu gwrës tressa yùrl Leitrim. Yth o dhodho meur a diryow in North ha West a Wordhen saw nyns esa y natur crowsek ow plêsya y wobrenoryon pò ‘tenants’. Ev o fest tydn ow tùchya y rentys ha pàn wrella ev vysytya onen a’y estâtys, an bobel a wodhya dre lycklod y fedha teylu gorrys in mes a’ga chy. Wosa bos passys Act an Dor ‘The Land Act’ bytegyns y hylly gobrenor mos dhe’n gort ha cafos asteveryans dâ mar peu va gorrys in mes a’y jy rag skyla vëth avês dhe dhyfyk pêmont a’y rent. Rag hedna dâ o gans radn anodhans kelly aga chy. Y fedha leverys adro dhe Arlùth Leitrim inwedh ev dhe bractycya droit de seigneur, hèn yw ev dhe gùsca gans myrhas y wobrenoryon kensa nos aga maryach. Nyns eus dùstuny vëth rag an whedhlow-na. Nyns o teg natur Arlùth Leitrim in nebes fordhow, hag yth hevel martesen ev dhe vos ow sùffra neb sort a gleves brÿs. Myttyn avarr in Mis Ebrel mil eth cans seyth deg eth pòr yêyn o an awel hag yth esa an Yùrl ow viajya gans dew servont in caryach dhyworth y jy ogas dhe Milford in Conteth Donegal, pàn veu va assaultys gans nebes tus ervys. Ev a veu ledhys. Pobel an còstys-na a wodhya yn tâ pyw a wrug an hager-ober saw kyn feu offrys reward brâs, ny veu an dhenledhysy kechys bythqweth. Istoryoryon a wor bytegyns fatell veu an mùrder gwrës gans tredden dhyworth Fanad in Conteth Donegal. I’n vledhen mil naw cans whegh deg y feu settys in bàn in Kindrum in Fanad (Donegal) men cov ha crows in onour an dus a ladhas Arlùth Leitrim. Certan re a’s gelow Gwlascaroryon Fanad pò ‘Fanad Patriots’. Na esyn ny dhe ankevy fatell o Arlùth Leitrim cothwas dewdhek ha tryugans bloodh pàn veu ledhys ha na ylly ev kerdhes yn ewn. Pelha an voldroryon a ladhas inwedh scrifwas Arlùth Leitrim, John Makim, peswar warn ugans bloodh ha’ga drîvyor yonk Charles Buchanan. Na fors pandr’o gwrës gans an yùrl, an dhew dhen yonk-na o inocent yn tien.