© 2015 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
Yma radn a Dhulyn Soth henwys Clonskeagh. In Godhalek an hanow-na yw Cluain Sceach pò ‘Pras an Spernen.’ An ger Sceach dell hevell yw goos nessa spedhes ‘briar’ in Kernowek, neb yw kefys moy ès unweyth in agan yêth ny i’n lavar spern ha spedhes pò spedhes ha spern. A les ywa nag eus ger mell pò ‘definite article’ i’n hanow Cluain Sceach, ha dhyworth hedna ny a yll predery an hanow dhe vos mar goth avell an oos pagan. Dre lycklod yth yw an spernen i’n hanow Cluain Sceach onen a spern an fayes pò ‘fairy thorns’ a yll bos kefys in tyleryow dyvers dres oll Wordhen. An radn vrâssa a’n spern-na yw a ehen an Spernen Wydn pò ‘hawthorn’ (Crataegus). Yma lies anodhans kelmys gans tyleryow hendhyscansek, bedhow chambour rag ensompel. Radn anodhans a yll bos gwelys ryb fentydnyow sans. Yth yw semlant crev ha cales dhe’n spernen, hag yth esa an bobel ow cresy gallos arbednek dhe vos tregys inhans. Warlergh tybyans an bobel res yw sevel orth mellya gans spernen vëth a’n par-na. Yth yw derivys in lies pluw whath in pùb conteth in Wordhen a nebonen a wrug sùffra drog-fortyn, falladow in negyssyow, cleves pò mernans kyn fe dre rêson ev dhe vellya gans an spernen sans. Pëth yw fùndacyon an whedhlow-ma? An gwiryoneth yw na wre an Wydhyly i’n oos rag-Cristyon derevel templys rag gordhya aga duwow, saw yth esens worth aga gordhya adro dhe wëdh, spessly spernen, ewen ‘yew’, ha kerdhynen ‘mountain ash’. Y a gresy an duw pò an spyrys dhe vos tregys i’n gwëdh aga honen. Pàn dheuth an grejyans nowyth, an Cristoneth, an duwow coth a veu remôvys dhyworth aga savla avell rewloryon an bës, saw ny wrussons dyberth yn tien. Y a veu trailys dhe fayes pò spyryjyon. Kyn wrug an Wydhyly recêva an Cristoneth, an grejyans pagan a remainyas adhelergh dhedhy in aga brës. Ny godhvia mellya gans an spernen sans rag hy o trigva spyrys galosek. Clonskeagh Cluain Sceach lebmyn yw mestra a Dhulyn. Nyns eus i’n tyller-na hedhyw ma’s treven, shoppys ha fordhow. Dre lycklod nebonen a wrug remôvya an spernen sans neb termyn i’n dedhyow coth, saw ny woryn ny a gafas ev cales lùck drefen ev dhe wil indella. Yma an semlant a sowena wàr Clonskeagh hedhyw i’n jëdh.