© 2015 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
Dulyn, chif-cyta Wordhen, a veu derevys wostallath wàr an ladn soth a’n ryver Liffey. Yma heyl pò estuary an ryver ow lenwel hag owth omdedna gans an mor-tid. Ny dheu dowr sal an mor aberth i’n ryver ma’s bys in tyller may ma Phoenix Park hedhyw dhe’n west a gres an cyta. Yma an hanow Phoenix y honen ow tos dhyworth an ger Godhalek fionnuisce, hèn yw dhe styrya dowr gwydn pò dowr melys; rag ny yll holan an mor bos tastys i’n dowr an ryver pella dhe’n west alena. Ow tùchya cres an cyta, res yw remembra nag esa pons vëth i’n dedhyow coth dres an ryver. I’n termyn-na y fedha clojow pò hurdles gorrys wàr wely an ryver ha fastys gans meyn brâs warnodhans mayth o downder an ryver isel lowr. Pàn vedha an mortid omdednys y hylly pobel ha bestas mos dres an ryver wàr an clojow. An clojow-na a ros an hanow Godhalek dhe Dhulyn: Áth Cliath ‘Rës an Clojow,’ pò ‘Ford of the Hurdles’. Hanow Sowsnek an cyta yw Dublin ha hèn yw a dhevedhyans Godhalek inwedh. Saw yma Dublin ow referrya dhe gen tyller ès Áth Cliath. Adro dhe gwarter mildir dhe’n ëst a rës an clojow yma ryver bian henwys an Poddle ow resek aberth in Dowr Liffey. Yma an ryver in dadn an byldyansow lebmyn saw i’n dedhyow coth yth esa ev a-ugh an dor. An Vikyngas a dherevys aga threvesygeth i’n elyn inter Dowr Liffey ha Dowr Poddle. Yth esa poll down ha tewl i’n Poddle dhe’n soth a’ga dynas. Hanow an poll o Duibhlinn pò ‘poll du’, ha hedna a ros y hanow dhe Dublin. I’n dallath hanow an dre o Dyvelyn, hanow a vedha ûsys in Sowsnek i’n osow cres. An versyon Latyn o Dublinia, hag yma an hanow arnowyth Dublin ow tos dhyworth an form-na in Latyn. Kynth usy Dowr Poddle in dadn an dowr lebmyn, pàn vo isel an mortid, y hyll bos gwelys maglen pò grating i’n gladn an Liffey le may ma Dowr Poddle ow resek aberth i’n Dowr Liffey. Pobel Dulyn a yll gweles an vaglen ha’n ryver bian ow resek dredhy saw pygebmys anodhans a wor fatell ros poll i’n keth ryver-na y hanow dh’aga cyta y?