(319) 'Morning' in Kernowek - lovinglivingcornish

Clyckya obma ha goslowes / Click here to listen

Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Rag leverel an jëdh-ma in Kernowek ny a lever hedhyw, ha’n jëdh usy ow tos warlergh hedhyw yw avorow. Rag bos pòr stroth yma avorow ow tallath wosa dewdhek eur i’n nos, pò in prÿs hanter-nos, dell lever Passyon agan Arlùth. In gwiryoneth bytegyns rag an radn vrâssa a’n bobel nyns usy an jëdh ow tallath erna wrella an howl dos in bàn i’n ÿst. An wharvedhyans-na yw gelwys howldrevel gans Lhuyd. Hag ev a’n gelow terry an jëdh kefrÿs. Herwyth William Pryce termyn an howldrevel o aswonys inwedh avell dëdhtardh. Dhyworth terry an jëdh bys in hanter-dëdh yw an myttyn pò mettyn. Ot obma nebes examplys in mes a’n textow: Ass yw wheg an hun myttyn! (Origo Mundi); yth yw scrifys fatell wrug Peder kemeres warnodho in presens oll an appostlys dhe gows in aga hanow y oll dhe’n bobel wàr du Fencost myttyn (Tregear); y leverys oferen de Gwener vettyn certan (Bêwnans Meryasek); ha ma gwreg vy ow pobas mettyn ha hy a wra gwil tesen ragos (Jowan Chy an Hordh). Mars on ny whensys dhe gôwsel adro dhe’n nessa dëdh pàn ywa passys solabrÿs, ny a yll leverel ternos, rag ensampyl: An Êdhewon ny vynna bos an ladron ow cregy ternos, rag Pask o dhedha (Passyon agan Arluth). Poken ny a yll leverel nessa mettyn, rag exampyl: ha nessa mettyn an wadn-wre’ty, hy a dhalathas dha wil cry ter o hy dremas hy destries (Jowan Chy an Hordh). Pàn wrellen ny dynerhy nebonen avarr i’n jëdh, ny a yll gwil devnyth a’n lavar complys gans Pryce: Mettyn dâ dha why. Poken ny a yll ûsya lavar recordys gans Richard Carew: Dùrda dha why. Hèn yw versyon cot’hës a Duw roy dëdh dâ dha why. In y erlyver Sowsnek-Kernowek a’n vledhen mil naw cans pymp deg dew yma Nance ow profya dew er rag ‘morning’. An eyl, heb mar, yw myttyn. Y gela yw bora, hag yma Nance ow pryntya dagyer dhyragtho dhe dhysqwedhes nag yw an ger kefys ma’s in Kernowek Coth. Nyns yw hedna ma’s hanter an whedhel. Nyns yw an ger bora kefys avell ger anserhak in tyller vëth. Nyns ywa gwelys in Gerva an Kernowek Coth ma’s in borales. Yma Nance owth ùnderstondya hedna dhe styrya flour an myttyn, hèn yw ‘daisy’ (yma an hanow Sowsnek ow tos dhyworth ‘day’s eye’). Yth yw an element bora complys unweyth arta gans Lhuyd in boragweyth ‘in the morning’. Nyns yw an adverb-na kefys in ken tyller vëth in Kernowek ha dre lycklod Lhuyd a wrug desmygy boragweyth wàr fùndacyon boreugwaith ‘myttyn’ in Kembrek. Wàr verr lavarow an ger rag ‘morning’ in Kernowek yw myttyn, mettyn. Dell leverys vy kyns, Mettyn dâ yw an Kernowek ewn rag ‘Good morning.’ Nyns yw bora ‘morning’ avell ger ino y honen kefys i’n tavas hengovek in tyller vëth. Dre rêson a hedna, ny yll bos comendys lavarow kepar ha *bora dâ, *bora teg na *bora brav.