© 2015 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
Golowan yw Gool Jowan Baptyst, hèn yw dhe styrya an peswora dëdh warn ugans a vis Efen. In Godhalek Golowan yw gelwys Lá Fhéile Eoin pò Dëdh Gool Jowan. An ger Godhalek fhéile in y form heb trailyans medhel yw féile. Yma an ger gool in Kernowek ha’n ger féile in Godhalek ow tos aga dew dhyworth an keth ger Latyn vigilia. Hèn yw vigil in Sowsnek, rag yma an hanow ow referrya dhe’n gordhuwher ha’n nos dhyrag an degol y honen, an termyn may fedha collenwys an radn vrâssa a’n solempnyta. Ny a red in awayl Sen Lûk fatell veu concêvys Jowan Baptyst whegh mis kyns ès Jesus. In dedhyador (pò calendar) an eglos Jesùs a veu genys dëdh Nadelyk, an pympes dëdh warn ugans a vis Kevardhu. Golowan ytho yw whegh mis dhyrag an jëdh-na. Saw yma mater aral dhe gonsydra obma. An kensa dëdh warn ugans a vis Efen y fÿdh an howl ow trehedhes y dyller uhella i’n ebron hag ytho an jëdh-na yw an jëdh hirra a’n vledhen. Wosa an jëdh-na y fÿdh an howl ow skydnya i’n ebron hag y fÿdh an dedhyow ow tallath cot’he. Nyns yw an kensa warn ugans a vis Efen ma’s termyn cot dhyrag Golowan, ha rag hedna an eglos a wrug kelmy an dhew dhëdh warbarth rag gwil gool Cristyon a’n jëdh pagan. Kyns dos an Gristoneth an Geltyon in North-West a Ewrop a’s teva solempnyta pagan a howlsav pò ‘solstice’ an hâv. Degol Jowan Sans pò Golowan ytho yw solempnyta pagan an howlsav in dadn y dhyllas Cristyon. Dëdh abrîs yw Golowan in lies pow in Brâstir Ewrop. In Wordhen y fedha an bobel in tyleryow owth anowy tansys wàr vre. Y a wre lebmel dres an tansys rag surhe aga yêhes ha sowena i’n vledhen esa ow tos. An bobel a wre leverel meur a bejadow dhe dhry bednath Duw warnodhans aga honen, wàr aga threvas ha wàr aga bestas. Dre vrâs bytegyns ny vedha Lá Fhéile Eoin onen a’n degolyow brâs in mesk an Wydhyly. Degolyow brâssa an vledhen in Wordhen yw dëdhyow an peswar qwarter: Samhain (De Halan Gwâv, an kensa dëdh a vis Du); Imbolc (Degol Bridget, an kensa dëdh a vis Whevrel); Bealtaine (Cala’ Mê, an kensa dëdh a vis Mê) ha Lúnasa (Calan Êst, an kensa dëdh a vis Êst). An re-na o an dedhyow brâs in dedhyador an Wydhyly. A les ywa nag eus dhe’n peswora dëdh warn ugans a vis Efen ma’s hanow Cristyon yn udnyk; in Godhalek ny’n jeves an jëdh hanow pagan vÿth. Kynth yw Golowan dëdh pòr vrâs in powyow erel, nyns usy Lá Fhéile Eoin owth apperya dhe vos a roweth brâs in Wordhen.