© 2014 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
Drog-gerys fest yw Olyver Cromwell in Wordhen, rag dew rêson dhe’n lyha. Kensa awos y soudoryon dhe ladha oll an dus esa ow whelas dyffres Drogheda wàr aga fydn; wosa hedna lu Cromwell a wrug an keth tra in tre Wexford. Secùnd ev a wrug banyshya an Wydhyly dhyworth aga thiryow ha’ga herdhya in kerdh dhe Connaught. Nyns yw certan bytegyns yw drog-hanow Cromwell dendylys yn tien ganso. Ow tùchya an ladhva in Drogheda ha Wexford, yma debâtyans in mesk istoryans. In Drogheda ny veu an soudoryon esa ow tyffres an dre parys dhe omry. Pàn vedha kemerys tre ûsys o i’n dedhyow-na ladha oll soudoryon an escar. In Wexford Cromwell a leverys an ladhva dhe vos breus Duw war an tyller, dre rêson a’n ladhva a Brotestans a wharva dres oll Wordhen teyr bledhen kyns, pàn wrug an Gatholygyon sordya warbydn an blansoryon. Nyns esa côws vëth i’n termyn-na a hager-oberow gwerryans pò war crimes. Na esowgh ny dhe ankevy batel Benburb teyr bledhen dhyrag Drogheda ha Wexford. I’n vatel-na an Gatholygyon a fethas ost a Bresbyteryans dhyworth Scotland. Garm gwerryans pò war cry an Gatholygyon o Sancta Maria (Maria Sans). Hèn yw dhe styrya fatell wrug an Gatholygyon ladha an Presbyteryans in hanow an Werhes Ker Maria. An dedhyow-na inwedh o termyn Gwerryans an Deg Bledhen warn Ugans (the Thirty Years’ War) in cres Ewrop, pàn veu lies tra uthyk gwrës in hanow Duw warbydn bobel inocent. An secùnd rêson rag hâtya Cromwell o ev dhe sêsya posessyon an Gatholygyon ha’ga danvon dhe dhrog-tiryow in West a’n pow. Saw bydner re wrellen predery ev dhe herdhya in mes pùbonen. Ny veu remôvys ma’s an berhenogyon. Gesys veu an bobel gebmyn, rag yth o othem anodhans rag gonys an tir. Apert yw dhyworth textys Godhalek a’n oos-na fatell o gwell gans an bobel gebmyn plansoryon Cromwell ès an berhenogyon Gatholyk neb a veu gorrys in mes gansans. In cov Godhalegoryon Wordhen gwir-vylen an oos-na o Murrough O’Brien, baron Inchiquin, hùmbrynkyas lu an mytern. Murrough a wrug lesky tiryow y eskerens ha ladha meur a bobel. Ev a loscas Peneglos Cashel pàn esa bùsh brâs a Gatholygyon inhy ha ladha lies pronter ha managh. Nyns yw campollys Cromwell i’n tradycyon côwsys an tavas Godhalek. Yma Murrough O’Brien ow pewa whath in Godhalek avell lavar coth.