© 2021 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
Theoderic yw hanow Tewtonek usy ow styrya ‘rêwlor an bobel’. Yma versyons dyvers a’n hanow kefys in tavosow dyffrans: Dietrich in Jerman, Dierek, Dirk in Iselalman ha Thierry in Frynkek. Heb dowt an Theoderic brâssa y hanow o Theoderic Meur, mytern an Ostrogothas. Theoderic a veu genys in Panônya (Austrya hedhyw) i’n vledhen peswar cans pymp deg peswar, mab dhe dhen nôbyl. Pàn o va maw Theoderic a veu kemerys dhe Gonstantynôpel avell gwystel. I’n cyta-na ev a gafas dyscans classycal dâ. Pàn o Theoderic leundevys, Zênô, an emprour in Constantynôpel, a’n gwrug comandyas a’n luyow Roman. I’n vledhen peswar cans eth deg naw Theoderic a gaskerdhas warbydn Odoacer, mytern Italy ha wosa nebes bledhydnyow ev a’n fethas ha gwil mytern Italy anodho y honen. Avell rêwlyas nowyth Italy Theoderic a scodhyas an menystrans Roman. Pelha ev a lêsas y bower bys i’n Balkans hag a dhros Gwlascor an Vysygothas in Spayn in dadn y rêwl. Pelha Borgayn in Gal Soth ha gwlascor an Vandalys in Afryca North a veu kemerys in dadn y allos inwedh. Theoderic a wrug y jif-cyta in Ravenna hag a vyldyas eglosyow ha palacys i’n cyta. An problem brâssa rag Theoderic o qwestyon an grejyans. Theoderic ha’n Gothas o Aryans saw moyhariv a bobel Italy o Catholygyon, hèn yw ewngryjygyon. Yth esa an Aryans ow tenaha an Drynjys Sans a dry ferson in udn Duw. Yth esens ow cresy fatell veu an Secùnd Person creatys iselha ès Duw an Tas y honen. Y feu an Aryanieth dampnys in Cùssel Nîss (‘the Council of Nicaea’) i’n vledhen try hans pymp warn ugans. An radn vrâssa a’n trîbys Jermanek a remainyas Aryans bytegyns. Dell hevel moy êsy o rag an trîbys Tewtonek cresy nag o Jesus person eternal a’n Drynjys adar esel a gynda mab den ha gour brâs dres ehen. In Italy res o gwetha an dhyw bobel separâtys an eyl dhyworth y gela. Chif-consler Theoderic o Boethius hag ev o Catholyk. Dre rêson an emprour in Constantynôpel dhe vos Catholyk inwedh, yth hevel fatell esa Boethius whensys dhe grefhe an colm inter eglos Rom ha’n emprour in ÿst. Nyns o Theoderic plêsys gans hedna hag a dôwlas Boethius dhe bryson ha wàr an dyweth y worra dhe’n mernans. Pàn esa ev in pryson Boethius a screfas lyver Latyn ‘An Confortys a Fylosofy.’ Hèn o onen a’n lyfryow moyha kerys i’n Ewrop i’n Osow Cres. Tro ha dyweth y rain gwlascor Theoderic a vedha godrosys gans an Gatholygyon a bùb tu. Ev a verwys in vledhen pymp cans dew dheg whegh. Le ès deg mildir warn ugans dhe’n soth a Ravenna yma cyta gelwys Cattolica, hèn yw dhe styrya ‘cyta Gatholyk’. Kyn nag yw certan devedhyans an hanow, yma certan scoloryon ow soposya fatell gafas Cattolica y hanow in cres an peswora cansvledhen pàn wrug an eglos degemeres rag tro an Aryanieth avell dyscans. Dell hevel an epscop Catholyk a fias dhe Cattolica rag cafos sentry. Ny veu an hanow chaunjys bythqweth. Dre lycklod yth esa epscop ewngryjyk tregys in Cattolica whath pàn o Ravenna ocûpys gans Theoderic an gamgrejyans.