© 2021 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
Mar teun ny ha meras orth gerlyver wàr lînen an Academi Kernewek, ny a red: gwrians ‘activity, action, deed’, liesek gwriansow. Nyns yw compes an artykyl-na. Heb mar yma an ger Kernowek gwrians ow mênya ‘activity’, saw nyns yw *gwriansow an form liesek. Praga? Dre rêson nag eus form liesek vëth kefys i’n tavas tradycyonal. Yma gwrians ganso y honen ow styrya ‘omdhegyans, taclow gwrÿs.’ Hèn a yll bos gwelys i’n examplys-ma: tormentores, dewgh yn scon may heuthhaho ow holon, a’gan gwrians na’m bo meth (Resurrexio Domini); dyswrÿs yw an pow lemmyn ha der dha wrians heb dowt lies marow (Bêwnans Meryasek); ha moy wordhy y wrians yw dhe gomendya dyblans (Bêwnans Meryasek); Lemmyn me a wor yn tâ orth dha worthyp ha gwrians dha vos cle’jys (Bêwnans Ke); Arlùth nev re bo gordhys, mar deg yth ov confortys der wrians an caradow (Bêwnans Ke); yma Sen Powl i’n kynsa chapter dhe’n Romans owth affirmya plain fatell wodhya an bobel meur a’n gwrians a Dhuw (Tregear); rag mar pedhons gerys dhe vos, martesen y a yll skynnya in myschyf a’n par-na may teffens ha tenna re erel dre aga tebel-examplys ha gwrians (Tregear); me a wor hag a lel-grÿs gwrians Duw y vos hebma (Creacyon an Bÿs). Nyns yw kefys an plûral nùmber a’n ger gwrians i’n tavas tradycyonal. Yth hevel ytho fatell yw cabm an form *gwriansow. Yma poynt aral dhe vos nôtys ow tùchya an ger gwrians. Pàn dhyllas Whitley Stokes golegyans a’n gwary screfys gans William Jordan, ev a ros dhe’n lyver an tîtel Gwrians an Bys: the Creation of the World. An geryow Gwrians an Bys a dheuth dhyworth Jowan Keigwyn. Orth dyweth an gwary in y versyon y honen Keigwyn a scrif: Hag in oll an bÿs-ma an gwrians why a welas. Hèn yw coynt, rag nyns usy an ger gwrians ow mênya ‘creation’ adar ‘activity, omdhegyans.’ An ger êwn in Kernowek hengovek rag ‘creation’ yw creacyon. Merowgh orth an pymp exampyl-ma in homylys Tregear: Onen) Rag in creacyon a bùb tra aral vysybyl ny wrug Duw an Tas a nev ma’s commondya…saw in creacyon a vab den an Tas a ûsyas solempnyta brâs. Dew) Y a gollas an oryjynal inocency, stât a vownj y in aga creacyon. Try) lemmyn merkyowgh, tus vas, pandra wrug Duw an Tas ragon ny in agan creacyon. Peswar) Whath rag procêdya pelha rag decernya an creacyon a dhen, why a wra ùnderstondya an second chapter a’n lyver a Moyses gelwys Jenesys. Pymp) an especyal royow a râss inha mab den o endewys i’n dallath in y creacyon. Pelha yma William Jordan acordys gans Tregear i’n negys-ma. Kynth usy Keigwyn owth ûsya gwrians rag ‘creation’ in y dext ev, William Jordan, auctour an gwary y honen, in keth tyller a scrif why a welas pub degrê lies maters gwaries ha creacyon oll an bÿs. Nyns eus jùstyfians vëth rag *Gwrians an Bÿs. An tîtel êwn yw Creacyon an Bÿs.