(333) Sacré Coeur - lovinglivingcornish

Clyckya obma ha goslowes / Click here to listen

Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Yth yw an devôcyon dhe Golon Sacrys Jesu (‘the Sacred Heart of Jesus’) neb tra aswonys dâ in mesk Catholygyon Roman. Porpos an devôcyon yw dhe dhownbredery a gerensa dhydhyweth Grist tro ha mab den. Kynth yw gwredhyow an devôcyon dhe whelas i’n Osow Cres, form an devôcyon aswonys hedhyw yw kelmys gans vesyons Margaret Maria Alacoque. Hy a veu genys in cres an seytegves cansvledhen in Borgayn, Frynk. Pàn o hy peswar warn ugans bloodh hy a veu gwrës lenes a Ordyr an Vysytacyon hag i’n lenjy hy a welas dew vesyon. I’n vesyons Crist a dhescas dhedhy an vaner ewn dhe bractycya devôcyon dh’y Golon Sacrys. Ny vêwas Margaret Maria ma’s teyr bledhen ha dewgans, saw termyn cot dhyrag hy mernans y feu hy pesys dhe inia an mytern may whrella va consecrâtya pobel Frynk dhe’n Golon Sacrys. Ny wharva an consecracyon kyns ès an vonarkieth dhe vos defendys in Wheldro Frynk. Awos pejadow epscobow Frynk bytegyns in vledhen mil êth cans pymp deg whegh an Pab a dheclaryas de Gwener nawnjek dëdh warlergh Pencast dhe vos degol an Golon Sacrys. Kynth o gyllys an myternsys, Frynk o Empîr dres ugans bledhen i’n nawnjegves cansvledhen in dadn an Tressa Napoleon. Ena an Jermans a wrug omlath warbydn an Francas ha kemeres Parys. Napoleon a fias dhe Bow an Sowson hag y feu Frynk poblegeth arta. Nyns o lies a wonesyjy Parys pÿs dâ gans an governans nowyth hag y a settyas in bàn in Parys rêwl radycal ha strifgar gelwys an Comûn. Wosa termyn cot soudoryon an army a sùppressyas an Comûn ha mîlyow a’n rebels a veu ledhys. Yth o arghepscop Parys gwystel in gwith an Comûn i’n eur-na, hag ev a veu ledhys gansans avell venjans. Dyw vledhen moy adhewedhes Seneth Frynk a vôtyas dhe dherevel basylyca dhe’n Golon Sacrys avell radn a dhasnowedhyans nacyonal wosa Frynk dhe vos fethys gans an Jermans ha’n Comûn dhe vos dyswrÿs. Montmartre, bryn uhel ow meras orth an cyta a Parys, a veu dôwysys rag tyller an eglos nowyth. Paul Abadie, penser, a wainyas an kesstrif dhe dhesînya an vasylyca. Gîs penserneth Sacré Coeur yw Roman-Besontîn, ehen a dhrehevyans nag o kebmyn i’n dedhyow-na. A-ugh chif-daras an eglos yma dew imach a vrons, onen a Louis Sans, mytern Frynk, ha’y gela a Jeanne d’Arc. Wàr jy yma meur a weder lywys hag orth nen an grobmvan yma kemeynyk pò ‘mosaic’ a Grist in Glôry. Ny veu Basylyca Sacré Coeur consecrâtys bys i’n vledhen mil naw cans nawnjek. Yth esa lies huny ow cresy fatell veu derevys an eglos in cov an soudoryon a gollas aga bêwnans i’n gwerryansow gans an Jermans. In gwiryoneth bytegyns vôta Seneth Frynk in mil naw cans seyth deg try a leverys fatell o an vasylyca porposys poran dhe wil amendys dhe Dhuw rag pehosow an Comûn. Ny worama mars yw possybyl herwyth dyvynyta Cristyon gwil aqwityans rag pehosow pobel erel. Na fors. Gans hy cromdohow a varbel gwydn yth yw Basylyca Sacré Coeur onen a eglosyow tecka a’n nawnjegves cansvledhen.