(335) Kepar ha Cyta Encledhys - lovinglivingcornish

Clyckya obma ha goslowes / Click here to listen

Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Yma an Nadelyk ow tos ha termyn yw dhe dhallath predery a royow dh’agan kerens ha dh’agan cothmans. Mars yw aswonys dhis nebonen usy ow côwsel Kernowek pò ow tesky an tavas, ena me a vynsa comendya dhis prena dhodho pò dhedhy lyver Kernowek a veu dyllys agensow. An lyver in qwestyon yw Kepar ha Cyta Encledhys gans Matthi ab Dewi, ost meurgerys Radyô an Gernewegva. Yma an lyver ow terivas whedhel a dhyw dhenythyans dyvers a’n keth teylu a Gernowyon henwys Pengilley. An kensa denythyans yw teylu Jacka Pengilley hag ymowns y ow pêwa in secùnd hanter an êtegves cansvledhen. Aswonys dhodhans yw Dolly Pentreth ha Wella Bodinar. Jacka, y wreg ha’y dry flogh yw tregys in penty bian wàr an cost north a Benwyth ogas lowr dhe Borth Ia. Jacka yw stenor ha pòr gales yw y vêwnans. Pelha apert yw dhe Jacka, Kernowegor determys, fatell usy an tavas ow merwel adro dhodho. Rag hedna yma va owth ervira screfa dëdhlyver in Kernowek. Yth yw an secùnd teylu tregys in West a Gernow in agan dedhyow ny—y yw an tas, Geoff Pengilley, y wreg ha’y dhew vab. A les brâs dhe’n mab cotha, Gary Pengilley, yw gonesygeth Kernow hag yma va ow tesky Kernowek in classys warlergh ourys scol. Dëdhlyver Jacka ha taclow erel yw gwithys in cofyr predn crev na veu bythqweth egerys bys in dallath an novel. Yth yw an dëdhlyver-na i’n tavas Kernowek ow kelmy yn stroth warbarth an dhew deylu, kynth yns y keskerys der an ajwy a dhew cans bledhen ha try ugans. I’n novel-ma yma Matthi ab Dewi ow ry dhyn pyctour glew a vêwnans bohosogyon in West a Gernow i’n êtegves cansvledhen, hag inwedh a’n caleterow a deylu a’n rencas cres isel in Kernow hedhyw i’n jëdh. Yma va ow ry dhyn yn arbednyk golok wàr an sort a gompressans godhevys gans wardhegor nag usy ow fyttya ajy re dhâ gans an vebyon erel in y scol. Yma experyens an dhew deylu gwies yn skentyl warbarth i’n novel hag yma Matthi ow presentya dhyn caracterow bewek ha cresadow. Y feu an novel screfys in Sowsnek in dadn an tîtel Like a Buried City. Me ow honen a wrug y drailya dhe Gernowek Standard ha tîtel an novel Kernowek yw Kepar ha Cyta Encledhys. Y feu an dhew versyon, Sowsnek ha Kernowek, dyllys orth an keth prës, an kensa dëdh a vis Du hevleny, dyw vil hag onen warn ugans. Yth yw Evertype an dyllor hag yma pùb lyver a’n dhew versyon ow costya nebes le ès pymthek puns. Y hyll an dhew lyver bos kefys dhyworth Amazon. Otta an manylyon arta: Kepar ha Cyta Encledhys screfys gans Matthi ab Dewi ha trailys dhe Gernowek gans Nicholas Williams, Dulyn, Wordhen.