(337) Sen Malô - lovinglivingcornish

Clyckya obma ha goslowes / Click here to listen

Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Yth yw seyth sans aswony avell fùndyoryon Gristyon Breten Vian ha prierynsys gelwys ‘Tro Breizh’ yw gwrÿs rag aga solempnya. An sens-na yw Tudwal, fùndyor Trégier, Pawl fùndyor St Pol de Léon, Brioc fùndyor St Brieuc, Corentin fùndyor Cornouailles, Padern fùndyor Vannes, Sampson fùndyor Dol ha Malô fùndyor St Malo. Whegh a’n seyth sans-na yw aswonys in tyleryow henwyn in Kernow saw nyns eus mencyon certan a Malô in tyller vëth in Kernow. I’n penfentydnyow adro dh’y vêwnans Sen Malô yw aswonys kefrÿs avell Maclou hag in Latyn Maclovius pò Machutus. Dell hevel Malô a veu genys in Kembra i’n vledhen pymp cans hag ugans. Nyns yw certan pandr’yw styr y hanow ev. Ny veu Malô besydhys erna veu va leundevys ha Brendan Golyor a wrug y vesydhya. Wosa bos besydhys gans Brendan, Malô a veu onen a’y dhyscyplys in Abaty Llancarfan in Kembra. Brendan y honen a veu genys in Soth-West a Wordhen ha’n whedhel gwelha aswonys anodho yw y drumach dres an mor dhe Enesow an Re Benegys, neb ehen a baradîs. Yth yw screfys fatell dhuryas an viaj dhe’n enesow adro dhe seyth bledhen. Nyns yw godhvedhys bytegyns ple ma an enesow benegys. Y feu lies tyller comendys: Enesow Canary, Enesow Farô, an Azôrês pò Madêra martesen. Dre lycklod nyns yns y ma’s tyller desmygys yn tien. Wosa y dermyn gans Brendan Malô êth dhe Vreten Vian hag ev a weresas Âron Sans ow lêsa an grejyans. Âron a veu an kensa epscop a Aleth (Saint Servan in agan dedhyow ny). Aleth yw pòr ogas dhe’n cyta gelwys Saint Malo hedhyw—tyller a recêvas an hanow-na in onour Malô Sans. Enesow Fâlklond yw bagas enesow in soth a’n Mor Atlantek adro dhe dry hans mildir dhe’n ÿst a Patagônya. Y feu an hanow Fâlklond rÿs gans an Sowson orth dyweth an seytegves cansvledhen dhe’n culvor inter an dhew enys brâssa in onour Antony Cary, pympes is-yùrl Falklond, tresoror morlu Pow an Sowson. Ny veu an hanow ûsys rag an enesow oll warbarth bys i’n vledhen mil seyth cans whegh deg pymp, pàn wrug Capten John Byron clêmya an enesow rag an Tressa Jory, mytern Breten Veur. Nyns o den vëth tregys wàr an enesow bys in cres an êtegves cansvledhen, pàn wrug Louis Antoine de Bougainville dhyworth Frynk growndya Port Louis wàr Fâlklond Ÿst. Ev a henwys an enesow Les Îles Malouines, hèn yw dhe styrya Enesow Sen Malô. Marners ha trevesygyon Port Louis a dheuth dhyworth St Malô in Breten Vian. An clêm dhe’n enesow a bassyas dhyworth Frynk dhe Spayn ha warlergh hedna dhe Arjentîna. An Sowson a fùndyas Port Stanley i’n vledhen mil eth cans peswar deg pymp. Dhyworth an termyn-na yma an wlasva Vretednek ow floryshya. In Spaynek Les Îles Malouines yw gelwys Las Islas Malvinas. An Wlascor Udnys a’s teves an gwir dhe’n enesow, ha’n gwir a veu aswonys spessly warlergh an gwerryans gans Arjentîna in bledhydnyow peswar ugans an cansvledhen dhewetha. Yma an Nacyons Udnys bytegyns ow referrya dhe’n enesow avell Falkland Islands/ Islas Malvinas.