© 2021 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
‘Cinderella’ in Sowsnek yw Lusewednyk in Kernowek, hanow desmygys wàr fùndacyon Luduennig in Bretonek. An whedhel yw kefys in lies pow. In Jerman chif-person an whedhel yw aswonys avell Aschenputtel. An versyon Frynkek, Cendrillon, a veu dyllys kyns oll i’n vledhen mil whegh cans naw deg seyth gans Charles Perrault. Y versyon ev yw indelma: Den gwedhow a dhemedhas y secùnd gwreg, neb o hautîn ha cruel, ha hy a’s teva dyw vyrgh. An den a’n jeva udn vyrgh gans an kensa gwreg ha hy clor ha dâ. An dhyw vyrgh a wre dh’aga leswhor gwil oll ober an chy. Ny gefy hy gwely medhel saw res o dhedhy cùsca i’n lusow ryb an tan. Rag hedna an leswheryth a’s gelwy Lusewednyk. Y wharva may whrug mab an mytern restry dauns hag oll mowysy bryntyn an dre a veu gelwys. Pàn o hy wheryth gyllys in kerdh dhe’n dauns, Lusewednyk a gafas vysyt dhyworth hy mabm besyth neb o fay. Lusewednyk a dheclaryas fatell garsa hy mos dhe’n dauns saw na ylly hy, drefen bos hy dyllas mar goth ha pelha na’s teva hy fordh vëth dhe viajya dhe’n palys. An fay dre bystry a wrug tekhe hy dyllas coth dhedhy ha gwil côcha in mes a bompyon. Pelha hy a wrug côchor in mes a logosen vrâs ha mergh a logas. Pàn dhrehedhas Lusewednyk an palys pùbonen a veu sowthenys dre hy thecter ha ny wrug an pryns dauncya gans ken mowes vëth. Lusewednyk a veu gwarnys gans an fay, y cotha dhedhy gasa an dauns kyns ès hanter-nos, hèn yw kyns ès hy fows teg dhe jaunjya wàr dhelergh dh’y dyllas coth. In hy hast dhe dhepartya, Lusewednyk a gollas onen a’y eskyjyow gweder. Pàn gafas an pryns an eskys, ev a leverys na vydna ev demedhy mowes vëth ma’s hodna esa an eskys gweder adro dh’y throos. Lies mowes a wrug assaya an whybanor pò ‘slipper’, an leswheryth comprehendys, saw ny wrug an eskys fyttya ma’s troos Lusewednyk yn udnyk. An pensevyk a gemeras Lusewednyk avell gwreg hag y a vêwas yn lowen warbarth. Y feu govydnys yn fenowgh o an eskys gwrÿs a weder in gwiryoneth. A les ywa i’n versyon Jerman fatell yw an eskys gwrÿs a owr. Pelha yma radn ow teclarya fatell o verre ‘gweder’ in Frynkek errour rag vair, ger Frynkek usy ow styrya sort a belour gwrÿs a grehyn sqwyweras rudh. Dre lycklod nyns yw gwir an styryans-na. Kyns oll Perrault a elwys y whedhel: Cendrillon, ou la petite pantouffle de verre ‘Lusewednyk pò an whybanor bian a weder.’ Pelha Perrault, esel a’n Academie Française, o certan an eskys dhe vos gwrÿs a weder. Apert yw na yllyn ny bos ow qwetyas gwirhevelepter in whedhel Perrault. Warlergh pùptra i’n gwirvÿs ny vëdh chaunjys pompyon dhe gôcha na logas dhe vergh. Kemerys oll warbarth res yw acceptya in whedhel Perrault fatell o eskyjyow Cendrillon gwrÿs a weder.