(341) Spernen Nadelyk - lovinglivingcornish

Clyckya obma ha goslowes / Click here to listen

Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Kyns ès dos an Gristoneth dhe’n West a Ewrop ha dhe’n enesow-ma, yth esa an bobel ow cresy fatell o gwedhen alosek an spernen wydn (Crataegus monogyna). An Eglos Gristyon a stampyas semlant Cristyon wàr an power-na. Yth o leverys rag ensampyl fatell veu genys agan Savyour in dadn spernen wydn. Pelha yth o cresys fatell veu an gùrun spern adro dhe bedn Crist gwrÿs a spernen wydn. An gwiryoneth-na a ylly styrya an drog pò an vertu a’n wedhen. Yth yw spernen wydn arbednyk kelmys gans Enys Wedren pò ‘Glastonbury.’ Herwyth an whedhel Josef Baramathia a vysytyas Enys Wedren ow ton ganso an Grêal Sans hag ev a herdhyas y lorgh aberth in dor Wearyal Hill adâl dhe Enys Wedren. Y welen a wredhyas hag a veu spernen wydn. Alena rag yma hy ow plejyowa dywweyth i’n vledhen, in mis Mê ha termyn Nadelyk. Res yw avowa nag yw Josef Baramathia kelmys gans devedhyans an Gristoneth dhe Bow an Sowson in scrîvyow avarr. An kensa scrif dhe dheclarya fatell dheuth Josef dhe Vreten Veur a veu screfys i’n tredhegves cansvledhen. Pelha nyns yw an spernen arbednyk complys rag an kensa prÿs ma’s bys i’n vledhen mil pymp deg ugans in lyver dyllys gans Richard Pynson in dadn an tîtel Bêwnans Josef Baramathia. Certan yw fatell veu an lyver screfys dre volùnjeth menegh Abaty Enys Wedren. I’n lyver-ma yth yw an spernen sans complys warbarth gans gwedhen knofen Frynk. Yth yw derivys adro dhe’n wedhen-na fatell wre hy blejyowa i’n hâv dëdh Golowan poran. Yth o an dhyw wedhen consydrys dhe vos tôkyn a favour Duw ha prov ytho fatell yw Enys Wedren an tyller moyha sans in oll Pow an Sowson. An abaty a veu degës i’n vledhen mil pymp cans try deg naw ha’n vrassa radn a’n byldyansow a veu tôwlys dhe’n dor in rain an kensa Elysabeth. An wernen bytegyns a bêsyas ow plejyowa prÿs Nadelyk. Nyns o an kensa Jamys na’n kensa Charlys mar escarus dhe’n Gatholygieth avell Elysabeth hag a les o dhodhans aga dew fatell wre an wernen blejyowa dywweyth i’n vledhen, unweyth adro dhe’n Nadelyk. Jamys Montagû, epscop Bath ha Wells, i’n dallath an seytegves cansvledhen a wrug darbary rag Anne a Dhenmark, gwrê’ty an Kensa Jamys, anterlyk hag ino an actour in part Josef Baramathia a wrug presentya dhe’n Vyternes branchys dhywar an Wernen Wydn ha dhywar an gnofen Frynk in cov an Abaty dystrôwys. An les dysqwedhys gans an teylu rial bytegyns in spernen wydn Enys Wedren a sordyas skeus in brës lies onen a’n Pûrytans, rag yth esens y ow perthy own y whre an Stûarts restorya an grejyans Catholyk. Y feu an Pûrytans crev lowr in Gwlas an Hâv hag y feu an vyternydhyon anwhek lowr dhodhans. Pàn dorras an Gwerryans Dynasek in mes, y feu spernen wydn Enys Wedren trehys dhe’n dor gans soudour a’n parlement. Kynth o hy dystrôwys, cov a’n spernen wydn a bêsyas in brës an bobel.