© 2022 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
San Marînô yw stât bian usy Italy oll adro dhodho. Yma va i’n Menydhyow Appenîn hag yth yw an an Mor Adriatyk nebes moy ès whegh mildir abell ryb cyta Rimini. Yth yw San Marînô an stât sovran cotha in oll an bÿs. Yth ywa an poblegeth selrethek ‘constitutional republic’ cotha in bÿs inwedh. I’n Osow Cres yth o Italy gwrÿs in bàn a lies dùcheth ha poblegeth. Yma baner Morlu Italy a’gan dedhyow ny ow qwil dhyn remembra hedna. In cres an baner yth yw gwelys i’n udn côta arvow an scochons a beswar poblegeth Italyan a’n Osow Cres: Jenôa, Venys, Pîsa hag Amalfy. Oll an poblegethow-na yw radn lebmyn a Italy. San Marînô wàr an tenewen aral a remainyas bys i’n jëdh hedhyw poblegeth anserhek ajy dhe Italy. San Marînô a gafas y hanow dhyworth Marinùs Sans. Ev a veu genys i’n vledhen dew cans seyth deg pymp hag ev o mason. Pàn veu cyta Rimini dystrôwys gans morladron, Marînùs a weresas ow tasterevel an cyta. Ena dre rêson a’n compressans a Gristonyon in dadn Dioclêcyan, emprour Rom, Marînùs êth dhe Mownt Tytânus i’n menydhyow hag a fùndyas ena managhty. An managhty-na o dallath San Marînô. I’n Osow Cres nebes kemenethow adro dhe’n managhty a jùnyas dhe’n poblegeth. Yth esa Dùcheth Ùrbînô oll adro dhe San Marînô, ha pàn wrug Stâtys an Pab perhenegy Dùcheth Ùrbînô, San Marînô a dhetermyas bos in dadn with an Pab. Ny wrug an Pab bythqweth cafos controllyans a’n poblegeth. Pàn wrug Napoleon conqwerrya Italy, y feu anserhogneth San Marînô in dadn wodros. Saw Antonio Onofri, onen a rewlysy San Marînô, a spêdyas dhe wainya revrons ha felshyp Napoleon—ha franchys San Marînô a veu assûrys. In bledhydnyow an Risorgimento yth o San Marînô sentry rag lies huny compressys dre rêson y dhe scodhya das-udnyans Italy. I’n vledhen mil eth cans pymp deg naw Garibaldi a fias dhe San Marînô gans Anita y wreg ha bagas bian a soudoryon. Yth o Anita owth omdhon aga fympes flogh i’n eur-na, saw hy a verwys. In dedhyow Mussolini yth esa governans San Marînô in dêwla Party Fashyst San Marîno. In Secùnd Gwerryans an Bÿs bytegyns San Marînô a dheclaryas y honen newtral. In mis Metheven mil naw cans peswar deg peswar an Airlu Rial a wrug bombardya San Marîno dre rêson an Sowson dhe gresy fâlslych fatell o sêsys San Marînô gans an Jermans hag y dhe ûsya an tyller dhe witha daffar omlath ino. Seneth an poblegeth yw an Consel Meur ha Jeneral. Pùb whegh mis yma an consel ow tôwys dew rewlyas gelwys captenow rejent. An rejens-na yw pednow an stât ha pednow governans kefrÿs. An dhew gapten a vëdh kemerys dhyworth dew barty dyffrans. Chif-dywysyansow San Marînô yw negys arhantiow, electronek, pryweyth ha tourystieth. Chif-ascor amêthek San Marîno yw gwin ha keus. Yth yw tollow in San Marînô iselha ès in Italy hag ytho yma companys plêsys dhe vos growndys i’n poblegeth. Dre rêson a oll hedna standard a vêwnans in Sàn Marînô yw pòr uhel.