(347) Hedhyw hag Avorow - lovinglivingcornish

Clyckya obma ha goslowes / Click here to listen

Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Me a garsa i’n recordyans-ma côwsel adro dhe’n geryow hedhyw hag avorow hag adro dhe eryow erel yw haval dhodhans ow tùchya mênyng. Yma an ger hedhyw ow styrya ‘an jëdh-ma.’ Rag ensampyl warlergh bos bysy dres pymp dëdh ow formya an nev ha’n bÿs, Duw an Tas in Origo Mundi a lever: ‘Hedhyw yw an wheghfes dÿdh abàn dhalethys gonys.’ Yth yw an ger hedhyw gwrÿs a’n dhew element he-, Sowsnek ‘this’, gwelys inwedh in haneth; hag a dhyw. *Dyw yw an keth element avell duw in duw Gwener, dugol, h.e. Mars eson ny ow côwsel adro dhe’n very dëdh-ma in Kernowek, ny a yll gwil devnyth a’n lavar in dÿdh hedhyw. Rag ensampyl Tregear a lever adro dhe’n Eglos: bythqweth whath ny fyllys dhia termyn an aposteleth bys in dydh hedhyw, na ny wra fyllell bys vycken. Mar mydnyn ny côwsel adro dhe’n present termyn ha leverel ‘in agan dedhyow-ny’, ny a yll gwil devnyth a’n lavar hedhyw i’n jëdh. Rag ensampyl Tregear a lever: Petylyânùs, neb a wrug despîsya an sê ha’n stall a Rom, kepar dell usy an heretykys lemmyn hedhyw i’n jëdh. Rag côwsel a vyttyn an jëdh hedhyw ny a lever hedhyw myttyn: rag ensampyl gwreg an gov in Passio Christi yw serrys gans hy gour ty drefen ev dhe avowa na yll ev gwil kentrow dhe growsya Crist awos y dhêwla dhe vos clâv. Hy a lever dhodho: pàn sefsys hedhyw myttyn certan yagh êns. Rag côwsel adro dhe’n gordhuwher a’n jëdh hedhyw ny a lever haneth: rag ensampyl in Passio Christi Jesu a lever dh’y dhyscyplys: my re dhesîryas fest meur debry genowgh why haneth boos Pask kyns ow bos marow. In Kernowek an nessa dëdh warlergh hedhyw yw avorow, ger yw dhe gelmy gans ‘morrow’ in Sowsnek. Rag ensampyl gwersyow Gwavas a lever: Gwra êwna gàs fordhow hedhyw pò avorow ha why a yll bos den dâ whath. Yma an jëdh avorow ow tos warlergh hedhyw. An jëdh warlergh avorow yw trenja. I’n gwetha prÿs nyns yw an ger-na kefys ma’s in gerva Edward Lhuyd hag ytho nyns eus dhyn ensampyl vëth anodho in ûsyans. An jëdh dhyrag hedhyw yw de. Saw nyns yw an ger-na destys ma’s in Kernowek Coth ha gans Lhuyd. Arta ny’gan beus ensampyl vëth anodho in ûsyans. I’n gwelha prÿs bytegyns yma dhyn udn ensampyl a’n ger rag gordhuwher de, hèn yw newher. An kensa scolor in Bêwnans Meryasek a lever: ny veuv in scol re’m leawta bys in newher gordhuwher. Hèn yw an rêson na yll ev redya nameur. An jëdh kyns ès de yw aswonys in Kernowek avell degensetê. Dell hevel yma hedna ow tos dhyworth *de kens ès de. I’n gwetha prÿs nyns yw degensetê kefys ma’s in gerva Lhuyd, ha rag hedna nyns eus ensampyl vëth dhyn anodho in ûsyans.