(348) Dwynwen Sans - lovinglivingcornish

Clyckya obma ha goslowes / Click here to listen

Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

In Pow an Sowson hag in Wordhen Degol Volans (St Valentine’s Day) yw dëdh an garoryon, hèn yw an peswardhegves dëdh a vis Whevrel. Yma colm arbednyk gans an sans in Wordhen. Yma eskern Volans Sans gwethys in crerva in eglos an Carmelîtas wàr Strêt an Vreder Wydn in Dulyn. Fatla dheuth an creryow-na dhe vos in Dulyn yw whedhel a les ino y honen ha me a vydn y dherivas neb termyn aral. In Kembra yma an bobel ow solempnya ken dëdh avês dhe Dhegol Volans avell dëdh specyal an garoryon, hèn yw dhe styrya Degol Dwynwen Sans. Hy dëdh hy yw passys solabrÿs hevleny, rag yma va ow codha wàr an pympes dëdh warn ugans a vis Genver. Yth yw leverys fatell o Dwynwen myrgh Brychan Brycheiniog, hag ytho yth esa hy ow pêwa i’n pympes cansvledhen. Den yonk gelwys Maelon Dafodrill a godhas in kerensa gensy. Yth esa Dwynwen hy honen in kerensa gans Maelon, saw ny ylly hy y dhemedhy rag yth o ken gour dôwysys rygthy gans hy sîra, Brychan Mytern. Dwynwen a veu pòr drist ha hy a besys Duw may whrella hy conqwerrya hy herensa rag Maelon. El Duw a omdhysqwedhas hag a ros dhedhy dewas hudol. Warlergh y eva Maelon a drailyas dhe yey. Ena Duw a wrug grauntya try thra dhe Dwynwen. Kyns oll Maelon y feu trailys dh’y form wredhek arta. Nessa Duw a bromyssyas dhe gemeres with a bùb gwirgaror. Tressa ny via Dwynwen troblys dre gerensa arta saw hy a vynsa gortos heb demedhy. Dwynwen ena a omdednas dhe enys vian gelwys Enys Llanddwyn, ryb an cost soth-west a Von pò ‘Anglesea.’ Hy a vêwas ena avell ancores remnant hy bêwnans. Yth yw leverys inwedh fatell wrug Dwynwen studhya vertu losow an tyller-na hag ytho hy dhe sawya cleves lies huny dre hy skentoleth. Enys Dwynwen a veu scrin a bris i’n Osow Cres hag yth esa caroryon ow qwil prierynsys dy. Warlergh an Reformacyon y feu an devôcyon dhe Dwynwen Sans ankevys. Saw ow tallath in bledhydnyow try ugans an cansvledhen dewetha y feu devôcyon dhe Dwynen Sans dasvewys. Hag i’n agan dedhyow ny yth yw Degol Dwynwen solempnys in Kembra avell dëdh brâs an garoryon. Yma lesson obma rag an Gernowyon. Adwen pò Adwenna Sans, kepar ha Dwynwen o myrgh Brychan Brycheiniog. Ytho whor o hy dhe Dwynwen hy honen. Yth yw eglos ha pluw Advent ogas dhe Rescamel in Kernow sacrys dhedhy. In tradycyons an bobel in Kernow Adwen yw mamsanses caroryon kepar ha’y whor Dwynen in Kembra. Martesen ytho yth yw termyn rag Kernowyon dhe wil dhe’n tradycyon-na dasvewa ha gwil dëdh brâs an garoryon a’y degol hy. I’n gwetha prÿs nyns yw godhvedhys pana dhëdh i’n vledhen yw an jëdh-na. Yma Catherine Rachel John in hy lyver ow tùchya sens Kernow, ow comendya may fo solempnys hy dëdh hy wàr dhegol Volans. Ny worama ow honen bytegyns mars yw hedna an gùssul welha.