© 2022 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
I’n cansvledhen dewetha Igor Stravinsky a dharbaras gwary cân in Latyn adro dhe whedhel Êdypùs, henwys Oedipus Rex. An versyon gwelha godhvedhys a whedhel Êdypùs bytegyns yw an trajedy in Grêca Coth gans Sofoclês gelwys Êdypûs Tyrannos pò ‘Êdypùs Mytern.’ Êdypùs o den yonk in Corynth hag yth esa ev ow cresy fatell o an mytern, Polybos, y sîra. Udn jëdh pedn medhow a’n mockyas in udn leverel nag o va gwirvab Polybos poynt. Êdypùs a veu ancrêsys hag ev êth dhe omgùssulya gans orakyl Delfy rag dyscudha an gwiryoneth. Ny wrug an orakyl gortheby y gwestyon saw declarya fatell vydna Êdypùs ladha y das ha cùsca gans y vabm y honen. Êdypùs ytho a erviras na wre va nefra dewheles dhe Gorynth, saw dallath wàr y fordh dhe gen cyta, dhe Thêbas. In tyller idn le mayth esa teyr fordh ow tos warbarth, Êdypùs a vetyas gans den in charet neb a whelas y worra dhywar an fordh orth y weskel gans garthow pò ‘goad’. Êdypùs a’n cronkyas ha’y ladha warbarth gans oll y gowetha marnas onen, neb a spêdyas dhe scappya dhyworto. An den i’n charet o Layùs, gwirdas Êdypùs, saw ny wrug naneyl Layùs nag Êdypùs aswon an eyl y gela. Êdypùs a brocêdyas dhe Thêbas le mayth o an cyta tormentys gans an Sfynx, euthvil a’s teva pedn benyn, corf lion hag eskelly edhen. Hy a wre govyn desmyk orth trevesygyon an cyta, ha pàn na ylly den hy gortheby, hy a’n ladha. An desmyk o indelma: ‘Yma i’n norvÿs best a’n jeves dewdros, trythros ha peswar troos saw udn hanow; yth ywa an udn best usy ow chaunjya y form ha pàn vo peswar troos indadno, hòn yw y form moyha lent. Pandr’ywa?’ Kyn na ylly den vÿth assoylya an desmyk, Êdypùs a’n assoylyas dystowgh. An best yw mab den: yma an flogh bian ow cramyas yn lent, ena ow kerdhes avell den tevys hag ow kerdhes gans lorgh pàn vo va gyllys in oos. Pàn welas an Sfynx fatell o hy desmyk assoylys, hy a dowlas hy honen dhywar garrek uhel. Cùrun Thêbas a veu rÿs dhe Êdypùs. Pelha ev a gemeras Jocasta, gwedhowes Layùs ha’y vabm y honen avell gwreg. Y feu dew vab ha dyw vyrgh genys dhodhans. Lies bledhen warlergh hedna plag uthyk a godhas wàr Thêbas. Orakyl Delfy a leverys na wre an plag dyberth erna vo denladh Layùs dyscudhys ha pùnyshys. Pàn esa hy ow whelas confortya Êdypùs, Jocasta a dherivas fatell veu Layùs ledhys in tyller idn le mayth esa teyr fordh. An eyl warlergh y gela tus a veu kefys a wodhya fatell veu Êdypùs forsâkys avell flogh bian wàr veneth, kefys gans bugel hag asvabys gans mytern Corynth. Wosteweth Êdypùs a gonvedhas fatell wrug ev y honen ladha y das ha demedhy gans y vabm y honen. I’n eur-na Jocasta a omladhas hag Êdypùs a worras in mes y dhewlagas y honen.